Umugabo wari umaze imyaka 26 abuze yabonetse ari muzima mu gice cyo munsi (cave/basement) cy’inzu y’umuturanyi mu mujyi wa El Guedid muri Algeria, mu ntera ngufi uvuye aho yabaga mu muryango we.

Sponsored Ad

Yitwa Omar Bin Omran, yabuze mu gihe Algeria yari mu bihe by’intambara y’imbere mu gihugu mu myaka ya 1990.

Ubu afite imyaka 45 kandi bamusanze muri metero 200 gusa uvuye aho yakuriye.

Abategetsi bemeje ko bataye muri yombi umugabo w’imyaka 61 ushinjwa gushimuta no gufunga uwo mugabo wabuze akiri umusore w’imyaka 19.
Omar yaburiwe irengero mu 1998 mu gihe hari intambara mu gihugu hagati ya leta n’imitwe igendera ku mahame akaze y’idini ya Islam.

Umuryango we wakekaga ko ari mu bantu ibihumbi bapfuye bakanabura muri icyo gihe cy’intambara.

Ariko, nk’uko abategetsi baho babivuga, uyu mugabo bamusanze ari muzima muri ‘cave’ y’uwo muturanyi wabo ku cyumweru gishize tariki 12 Gicurasi.

Icyaha “cy’ubugome”
Ubugenzacyaha bwabonye amakuru avuga ko Omar bin Omran yaba afungiye mu nzu y’umuturanyi.

Umukozi wo mu bucamanza yagize ati: “Bivuye kuri ayo makuru, umushinjacyaha mukuru yategetse jandarumeri gutangiza iperereza ryimbitse, maze bajya kuri urwo rugo.

“Tariki 12 Gicurasi(5) saa mbiri z’ijoro ku isaha yaho, Omar Bin Omran w’imyaka 45, bamusanze ari muzima muri ‘cave’ y’umuturanyi we.”

Ukekwa kumufunga muri ubwo buryo yashatse guhita ahunga aho hantu, ariko abashinzwe umutekano baramufata.

Uku gushimuta bivugwa ko yagukoze kubera amatati y’izungura, nk’uko umuvandimwe w’uyu wari warashimuswe yabivuze ku mbuga nkoranyambaga.

Abategetsi bavuze ko iperereza rikomeje kandi ko Omar arimo gukurikiranwa n’abaganga, n’abavuzi b’indwara zo mu mutwe.

Umuvuguzi w’ubushinjacyaha yavuze ko iki gikorwa ari icyaha “cy’ubugome”

Omar yabwiye abategetsi ko atigeze abasha gutabaza kuko uwamushimuse yari yaramwumvishije ko “yahanzweho na sekibi”.

Ibinyamakuru muri icyo gihugu bivuga ko nyina wa Omar yapfuye mu 2013 atazi ko umuhungu we akiriho.