Gasogi United yongeye guhagama APR FC muri shampiyona, Sunrise FC yikura mu rwobo
Yanditswe: Sunday 28, Apr 2024
Ikipe ya APR FC yanganyije na Gasogi United igitego 1-1 mu mukino w’Umunsi wa 28 wa Shampiyona, ikomeza agahigo ko kudatsindwa mu gihe habura imikino ibiri ngo Shampiyona ya 2023-2024 irangire.
Uyu mukino wabaye Kuri iki cyumweru tariki 28 Mata 2024, kuri Kigali Pele Stadium.
Nyuma y’igice cya mbere kidashamaje cyarangiye ari 0-0,ku munota wa 61,Gasogi United yazamukanye umupira yihuta, Rugangazi Prosper awuhindura imbere y’izamu Balako Christian Panzi akina n’umutwe atsinda igitego cya mbere
Ku munota wa 80, APR FC yazamutse yihuta, Mbaoma acomekera umupira Mugisha Gilbert umupira mwiza yishyura igitego cya mbere.
Umukino warangiye APR FC yanganyije na Gasogi United igitego 1-1.
Indi mikino yabaye kuri uyu munsi yari ikomeye cyane kuko amakipe yose ari mu rugamba rwo guhatanira kutamanuka mu Cyiciro cya Kabiri.
Sunrise FC yakoze akazi gakomeye itsinda Gorilla FC ibitego 2-1 byombi bya Nzabonimana Prosper, mu gihe Etoile de l’Est nayo yatsinze Marines FC igitego 1-0 cya Muhoza Olivier ku munota wa 43.
Bivuze ko Ikipe y’i Nyagatare yagize amanota 29 iva mu murongo utukura, mu gihe Etoile de L’Est yagumye ku mwanya wa nyuma inganya amanota 28 na Bugesera FC ya 15.
Leave a Reply
Your email address will not be published. Required fields are marked *