Ikipe ya Real Madrid yageze ku mukino wa nyuma wa UEFA Champions League itsinze Bayern Munich ibitego 2-1, iyisezerera muri 1/2 iyitsinze ibitego 4-3 mu mikino yombi.

Sponsored Ad

Bigoranye, Real Madrid yatsinze Bayern Munich ibitego 2-1 bya Joselu mu minota ya nyuma, isanga Borussia Dortmund ku mukino wa nyuma wa UEFA Champions League uteganyijwe tariki 1 Kamena 2024.Umukino ubanza amakipe yombi yari yanganyije ibitego 2-2.

Umukino watangiye Real Madrid yari mu rugo iri hejuru ndetse yashoboraga gutsinda igitego hakiri kare,ubwo ku munota wa gatanu Dani Carvajal yakataga umupira uca imbere y’izamu habura uwusongamo.

Munich nayo yahise isubiza muri ubwo buryo ubwo Serge Gnabry yakataga umupira imbere y’izamu rya Madrid, Kane nawe ananirwa kuwushyira mu nshundura.

Ku munota wa 13,Vinicius yateye umupira ukubita igiti cy’izamu uragaruka,Rodrygo awusubijemo,umunyezamu Neuer arawufata.

Rutahizamu Harry Kane nawe mu gice cya mbere yabonye uburyo bukomeye ku mupira yateye mu izamu uca ku ruhande gato.

Amakipe yombi yakomeje gukina acungana byatumye igice cya mbere kirangira ari 0-0.

Igice cya kabiri cyatangiye nabwo Madrid ishaka gushimisha abafana ariko umunyezamu Neuer agora cyane Vinicius Jr wari wamwibasiye.

Vinicius Jr yateye umupira ukomeye ubwo Real madrid yari ikataje ishaka igitego, Neuer awukuramo.

Bayern Munich yashoboraga kubona igitego ku munota wa 67, nyuma y’aho Davies yateye umupira ujya hanze.

Mu gihe Real Madrid yasatiraga cyane,Bayern Munich yayibye umugono ibatsinda igitego ku munota wa 68 gitsinzwe na Alphonso Davies ku mupira yahawe na Harry Kane acenga myugariro Rudiger,atera mu izamu ishoti rikomeye rijya mu izamu.

Nyuma y’iminota itatu,Real Madrid yishyuye ariko igitego cyayo cyinjiye Nacho amaze gusunika myugariro Kimmich,VAR ifasha umusifuzi kwemeza ko habayeho ikosa.

Ku munota wa 88,umunyezamu Neuer wari wagoye Real Madrid yakoze ikosa arekura umupira yari atewe na Vinicius Jr,usanga rutahizamu Joselu awusubiza mu izamu kiba igitego cya Real Madrid cyo kwishyura.

Iminota 90 yarangiye ari igitego 1-1 hanyuma hongerwaho iminota icyenda yabaye iy’ibyishimo kuri Real Madrid.

Ku munota wa mbere wayo,Joselu yatsindiye Madrid igitego cya kabiri nyuma y’umupira mwiza yahawe na Rudiger.

Byabanje kwemezwa ko habayeho kurarira kwa Rudiger ariko habayeho isuzuma rya VAR ryemeza ko nta kurarira kwabayeho.

Mu mpera z’iminota y’inyongera,Bayern Munich yabonye igitego ariko abasifuzi baracyanga bemeza ko habayeho kurarira ariko Thomas Muller wasaga n’uwaraririye ntiyigeze akina umupira,byatumye de Ligt aratsinda.

Iki gitego cyanzwe cyababaje abantu ba Bayern Munich ndetse bamwe barigaragambya bigaragara.

Umukino warangiye Real Madrid itsinze ibitego 2-1 ndetse biba ibitego 4-3 mu mikino yombi.Vinicius jr niwe wabaye umukinnyi w’umukino.

Iyi ni inshuro ya 18 ikipe ya Real Madrid igeze ku mukino wa nyuma wa UEFA Champions League.Yatwaye ibikombe 14,itsindwa inshuro 3 ku mukino wa nyuma.

Iyi ni inshuro ya gatandatu iki kigugu kigeze ku mukino wa nyuma mu myaka 11 ishize.

Ku rundi ruhande,umutoza Carlo Ancelotti ageze ku mukino wa nyuma ku nshuro ya gatandatu,yatsinze inshuro 4, atsindwa inshuro imwe gusa.