Werner Froneman na Des Werner bari bayoboye umushinga w’indege yakozwe n’abana bato bo muri Afurika y’Epfo baguye mu mpanuka y’indege yabereye muri Tanzania.

Sponsored Ad

Umushinga w’indege yakozwe n’abana bo muri Afurika y’epfo ngo ive i Cape igere i Cairo igaruke, watangaje urupfu rw’aba bayobozi bawo baguye mu mpanuka y’indege yabereye muri Tanzania.

Impanuka yabaye ejo kuwa gatandatu taliki ya 03 Kanama 2019 i Tabora muri Tanzania yaguyemo aba banyafurika y’epfo babiri, ubwo yerekeza muri Malawi nk’uko byahise bitangazwa na Azam TV yo muri Tanzania.

Umushinga U Dream Global watangaje ko "ubabajwe no gutangaza impanuka y’indege y’ubufasha yapfiriyemo abayobozi b’uyu mushinga Des Werner na Werner Froneman".

U Dream Global yatangarije kuri Facebook ko nta wundi muntu wagirize ikibazo kubera iyi mpanuka.

Umushinga wa U Dream Global watekerejwe na Megan Werner, umukobwa w’imyaka 17 washakaga kugera ikirenge mu cya se Des Werner usanzwe ari umupilote.

We na bagenzi be bagera kuri 20 b’urungano batangiye uyu mushinga, bubaka indege yabo nubwo bari batarabona uburenganzira bwo gutwara indege.

Des Werner usanzwe ari umupilote w’indege za gisiviri yiyemeje kuba hafi y’uru rubyiruko mu nzozi zarwo zo gutwara indege rwiyubakiye nk’uko yabibwiye BBC mu ntangiriro z’ukwezi kwa gatandatu.

Babigezeho, muri uko kwezi bahaguruka i Cape berekeza i Cairo bagomba guhagarara mu bihugu 11.

Bari baherekejwe n’indege y’ubufasha y’abapilote babigize umwuga, ari nayo yakoze impanuka kuri uyu wa gatandatu irimo Des Werner na Werner Froneman.

Urugendo rw’indege y’aba bana rugeze mu gice cya Afurika yo hagati bava i Cairo basubira i Cape muri Afurika yEpfo aho bahagurukiye.

Megan Werner wagize igitekerezo cy’uyu mushinga,yabuze umubyeyi we Des Werner waguyemo mu mpanuka y’indege

Inkuru ya BBC