Isosiyete ikora ibijyanye no gutangaza amakuru mu Bwongereza (BBC) yafunze ibiro byayo muri Tanzania nyuma yuko umwe mu bakozi bayo asanganywe coronavirus.

Sponsored Ad

Nk’uko uwashoboye kuvugana n’uyu munyamakuru utifuje ko amazina ye yatangazwa, ngo uyu mukozi ni umutekinisiye wa sitidiyo ndetse ngo n’abandi bakoranaga bagera kuri 20 bahise bashyirwa mu kato.

Amakuru akomeza avuga ko uyu mukozi wasanganywe coronavirus ameze neza kandi atarembye cyane.

Kubera iyo mpamvu kandi, BBC yimuye porogaramu yayo y’igiswahili Amka na BBC, ubusanzwe ivugira muri Tanzania, iyijyana i Nairobi. Ibiro byafunzwe bifite icyicaro i Mikocheni mu nkengero z’umujyi wa Dar es Salaam.

Muri Tanzania, ku wa Gatatu umubare w’abanduye COVID-19 warazamutse ugera kuri 480 nyuma yuko abantu 196 bashya banduye coronavirus.

Minisitiri w’intebe w’iki gihugu, Kassim Majaliwa, yatangaje ko iki gihugu cyanditse kandi abandi bantu batandatu bapfuye, bigatuma umubare w’abahitanwa n’iki cyorezo ugera ku bantu16 kuva iyi virusi yagaragara bwa mbere muri Tanzania.

Iyi mibare mishya yatumye Tanzania iza ku isonga mu bihugu byo mu karere bifite abanduye coronavirus benshi, irenga Kenya, ikaba imaze kwemeza 396 kugeza ku wa kane tariki ya 30 Mata. U Rwanda rufite ibibazo 225 mu gihe Uganda ifite 81 bemejwe – 14 muri bo ni abashoferi b’amakamyo yo muri Kenya na Tanzania.

Tanzaniya yanenzwe cyane kubera ingamba zidahwitse yafashe zo kwirinda no gukumira Covid-19, nyuma y’uko Perezida John Pombe Magufuli yemereye amatorero gukomeza gukora avuga ko coronavirus itazarokoka mu rusengero cyangwa mu musigiti.