skol
fortebet

Biden Intsinzi ari kuyikozaho imitwe y’intoki

Yanditswe: Saturday 07, Nov 2020

Sponsored Ad

skol

Joe Biden yongeye kuvuga ko yizeye intsinzi mu gihe bigaragara ko ari kwegereza gutsinda Donald Trump mu matora ya perezida w’Amerika yabaye ku wa kabiri.

Sponsored Ad

Uyu mukandida w’abademokarate amaze kugira amajwi y’intumwa zitora (electoral votes) 253 mu gihe haba hacyenewe 270 ngo umukandida atsindire kuba perezida. Bwana Trump afite amajwi nkayo 214 kugeza ubu.

Bwana Biden ari n’imbere mu majwi amaze kubarurwa muri leta z’isibaniro za Georgia, Nevada, Pennsylvania na Arizona.

Intsinzi ya Biden yaba ivuze ko Bwana Trump mu kwezi kwa mbere yava mu biro bya White House amaze imyaka ine akoreramo.

Biden yavuze iki nyirizina?

Mu ijambo ejo ku wa gatanu nijoro yagejeje ku bamushyigikiye ari mu mujyi wa Wilmington muri leta ya Delaware, ari ho cyicaro cy’ibikorwa bye byo kwiyamamaza, yagize ati:

"Tugiye gutsinda aya matora".

Yumvikanye mu mvugo nk’umuntu wifitiye icyizere kurushaho, mu gihe amajwi amaze kubarurwa agaragaza ko akomeje kurushaho gusiga Donald Trump.

Ubwo yavugaga iryo jambo, yari ari kumwe na Kamala Harris, senateri wa leta ya California, biyamamazanya nk’uwamubera visi perezida atsinze aya matora.

Yavuze ko ari hafi gutsindira amajwi 300 y’intumwa zitora, avuga ko abantu benshi cyane batoye kwiyamamaza kwe - abarenga miliyoni 74 - kurusha undi mukandida-perezida uwo ari we wese wabayeho mu mateka y’Amerika.

Bwana Biden yavuze ko Abanyamerika bamuhaye inshingano zo kurwanya icyorezo cya coronavirus, guhangana n’ubukungu butifashe neza, imihindagurikire y’ikirere ndetse n’irondabwoko ryabaye akarande.

Uyu mukandida w’abademokarate wiyamamaje nk’ushaka ubumwe bw’Abanyamerika, yavuze ko igihe kigeze ngo "imvugo isesereza ive muri politike" ndetse habeho "gutanga ibitekerezo mu bwubahane".

Ati: "Dushobora kuba tutavuga rumwe ariko ntabwo bivuze ko turi abanzi, turi Abanyamerika". Ntiyigeze avuga Bwana Trump, mukeba we w’umurepubulikani.

Iri jambo rya Bwana Biden ubundi ryari ryarateganyijwe nk’ijambo ryajyaga kuba iryo kwishimira intsinzi, ariko yahisemo ahubwo kurivugamo uko ibintu bihagaze ubu muri rusange mu matora, mu gihe televiziyo zo muri Amerika zigengesereye zikaba ziretse kumutangaza ko yatsinze.

Bwana Biden yavuze ko yizeye ko kuri uyu wa gatandatu aza kugeza irindi jambo ku Banyamerika.

Nta kigaragaza ko Trump yabyemera abaye atsinzwe

Bwana Biden - mbere y’ubu wari wariyamamarije kuba perezida mu mwaka wa 1988 no mu 2008, ntabigereho - yaba abaye perezida wa mbere ushaje ubayeho mu mateka y’Amerika mu gihe yaba arahijwe mu kwezi kwa mbere, ku myaka 78.

Naramuka atangajwe muri iyi mpera y’icyumweru ko ari we watsinze amatora, biteganyijwe ko itsinda rye ritangira ubutegetsi bw’inzibacyuho (cyangwa bw’imfatakibanza mu Kirundi) ku wa mbere.

Urwego rushinzwe gucungira umutekano abategetsi bakuru b’Amerika rwohereje muri leta ya Delaware abo kongerera imbaraga abarinda Bwana Biden.

Urwego rw’indege za gisivile narwo rwagabanyije ingendo zemerewe kuba hejuru y’ikirere cyo mu mujyi wa Wilmington wo muri iyo leta, aho Bwana Biden ari.

Ariko, nta kigaragaza ko mu gihe kigufi kiri imbere Bwana Trump azemera kumuha ubutegetsi biramutse bibayeho agatsindwa aya matora.

Ejo ku wa gatanu nyuma ya saa sita z’amanywa, Bwana Trump yanditse kuri Twitter ati:

"Joe Biden ntakwiye kwiyitirira umwanya wa Perezida mu buryo butari bwo. Nanjye nshobora gukora nk’ibyo. Ibikorwa byo mu rwego rw’amategeko ubu biratangiye!"

Bwana Trump amaze iminsi avuga - nta gihamya atanga - ko habayeho uburiganya muri aya matora. Byatumye bamwe mu barepubulikani bagenzi be bavuga ko iyo mvugo ikwiye guhagarara.

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa