Imitwe 6 y’inyeshyamba y’abaKongomani,yiyemeje kwifatanya n’ingabo za leta,FARDC mu kurwanya imitwe y’abanyamahanga ikorera mu burasirazuba bw’iki gihugu.

Sponsored Ad

Iyi mitwe yakoze ihuriro yise RPRC (Réseau des Patriotes Résistants Congolais) ryo guhuza imbaraga mu kurwanya imitwe y’abanyamahanga iba muri RDC,irimo ADF,FDLR,RUD-URUNANA n’iyindi.

Iri huriro ryashingiwe mu Murenge wa Wanianga, muri Teritwari ya Walikale, muri Kivu y’Amajyaruguru. Iyo mitwe yishyize hamwe ni: Nduma Defense of Congo (NDC-R) uyoborwa na Guidon Shimiray, Mai-Mai Kifuafua ya Delphin Mbaenda, Mai-Mai Simba, ya UPLD, Mai-Mai MAC ya Mbura Matondi na Mai-Mai Raiya Mutomboki Ntoto ya Shebi Bazungu.

Mu minsi iri imbere,ihuriro rya RPRC rirateganya kuzageza kuri guverinoma ibyo naryo risaba mu biganiro biteganyijwe mu minsi iri imbere i Kinshasa.

Ihuriro rya RPRC ryashinzwe mu rwego rwo kumvira Perezida Felix Tshisekedi, wasabye imitwe y’inyeshyamba y’abanyagihugu kwifatanya na leta mu kurwanya imitwe y’abanyamahanga ikorera mu burasirazuba bwa RDC.

Nubwo operation Sukola 2 ya FARDC yo kurandura imitwe muri Kivu zombi iri gutanga umusaruro muri iyi minsi,RDC ikeneye imbaraga zidasanzwe kugira ngo irandure burundu inyeshyamba zimaze imyaka myinshi ziri ku butaka bwayo,ziyihungabanyiriza umutekano.