Perezida mushya wa RDC,Felix Tshisekedi yahaye imbabazi imfungwa 700 za politiki zirimo izafunzwe n’uwo yasimbuye Joseph Kabila ndetse ategeka zivanwa mu nzu z’imbohe bidatinze.

Sponsored Ad

Nubwo hasinywe amasezerano y’ubwumvikane hagati ya Joseph Kabila n’abatavuga rumwe n’ubutegetsi,uyu mugabo wamaze imyaka isaga 18 ku butegetsi bwa RDC yanze gufungura izi mfungwa none birangiye Tshisekedi abikoze.

Mu itangazo ryasohowe na Vital Kamerhe ukuriye ibiro bya perezida Felix Tshisekedi ,yemeje ko izi mfungwa za politiki 700 zarekuwe nkuko Tshisekedi yari yarabisezeranyije yiyamamaza.

Mu itangazo yasomeye kuri televiziyo y’ igihugu,RTNC, kuri uyu wa Gatatu,Vital Kamerhe yanavuze ko abantu bose batawe muri yombi mu myigaragambyo yo guharanira demokarasi hagati ya 2015 na 2018 bose bababariwe.

Abanyapolitiki benshi muri RDC bakomeje kwishimira ibikorwa bya Felix Tshisekedi ndetse zimwe mu nyeshyamba zahise zishyira intwaro hasi mu rwego rwo kumwereka ko zimushyigikiye.

Mu banyapolitike bazwi cyane muri RDC barekuwe na Tshisekedi harimo Franck Diongo wari warakatiwe imyaka 5 na Firmin Yangambi wakatiwe imyaka 20 mu mwaka wa 2009 azira kwitwa umugambanyi.