Ubutabera bwo mu Busuwisi bwatangaje ko bwaciriye urubanza abantu batanu bari mu itsinda ry’abashinzwe kurinda umutekano wa Perezida Paul Biya wa Cameroun, nyuma y’uko bafatiwe i Genève ku wa Kabiri w’iki cyumweru bazira guhohotera umunyamakuru.

Sponsored Ad

Ikinyamakuru cyo mu Busuwisi, Tribune Genève cyanditse ko aba bantu b’igitsinagabo batanu bagejejwe imbere y’urukiko kuri uyu wa Gatatu mu gihe undi wa gatandatu w’umugore yarekuwe kuko yari afite pasiporo y’abadipolomate.

Nkuko itangazo rya guverinoma y’i Genève ribivuga, umunyamakuru w’umugabo wa Radio Télévision Suisse (RTS), yatanze ikirego mu rukiko arega aba bantu aho abashinja kuba baramusagarariye imbere ya hoteli ubwo yarimo akurikirana imyigaragambyo y’abarwanya Perezida Biya mu cyumweru gishize.

Iri tangazo rivuga ko uyu munyamakuru yakomerekejwe byoroheje ndetse n’ibikoresho bye bikangizwa.

RTS (uyu munyamakuru akorera) yatangaje ko aba bagabo bahamijwe ibyaha byo “gusagarira, kwangiza ibikoresho by’akazi ndetse no kwiha ububasha butemewe”. Iyi shene yongeyeho ko urukiko rwabakatiye igihano gisubitse gishobora kugera byibuze ku mezi atatu y’igifungo. Ngo bahise barekurwa.

Perezida Paul Biya ari ku butegetsi kuva mu myaka 36 ishize ndetse aherutse kwegukana intsinzi mu matora y’umukuru w’igihugu yabaye mu 2018 muri manda y’imyaka 7 iri imbere. Gusa kenshi akunda gushinjwa uburyo bw’imiyoborere ye n’ingendo nyinshi agirira mu mahanga.

Hari raporo yashyizwe hanze n’abanyamakuru b’inkuru zicukumbuye ivuga ko mu 2017, Perezida Biya yaba yaramaze iminsi iri hejuru ya 60 hanze y’igihugu cye yibereye muri gahunda ze bwite.