Trump Ati “Kandi niba Putin ankunda ibyo ni iby’agaciro, ntabwo nabiryozwa.”

11 January 2017. | Mu mahanga | 1 Ibitekerezo | Janvier Iyamuremye
  • MyPassion

Donald Trump uherutse gutorerwa kuyobora Leta zunze ubumwe za Amerika, bwa mbere yagiranye ikiganiro n’abanayamakuru. Ni ikiganiro cyaranzwe no gushimangira ibyo yiyemeje ubwo yiyamamazaga.

Donald yagarutse kuri gahunda zitandukanye azakora ari k’ubuyobozi nka ObamaCare, urukuta ruzabatandukanya na Mexique, kutizera inzego z’iperereza, kuba yaba akorana na Moscow n’ibindi…

Kuva ikiganiro cyatangira kugeza gisoje, Donald Trump wavuzweho kudacana uwaka na bimwe mu binyamakuru bitamushyigikiye ubwo yiyamamazaga yanabigaragaje mu iki kiganiro ubwo yangaga ko umunyamakuru wa CNN amubaza ahubwo amubwira ko atari CNN ahubwo ko ari ‘Fake News’.

Umwe mu bakozi be yabanje afata umwanya munini asobanura uburyo Donald Trump azaba yeguye mu buyobozi bw’ibigo by’ubucuruzi na business ze zose kugira ngo akore umurimo wa Perezida nta bindi bimuziritse.

Trump yahakanye ko adakorana na Moscow, anavuga ko niba Uburusiya bwarabagabyeho ibitero by’ikoranabuhanga (hacking) atari bo bonyine babigaba kuri US kuko hari n’abandi babikora.

Ati “Kandi niba Putin ankunda ibyo ni iby’agaciro, ntabwo nabiryozwa.”

Abajijwe ku by’imisoro imwe n’imwe adatanga yavuze ko ibyo bikunda gukurikiranwa n’itangazamakuru gusa.Ati “abantu bonyine bita ku by’imisoro yanjye ni abanyamakuru.”

Muri iki kiganiro umunyamakuru wa CNN yasabye umwanya ngo abaze ikibazo Trump, Trump abanza kumusobanurira amakosa ikinyamakuru cyabo cyakoze mu bihe bye byo kwiyamamaza kimusebya.

Umunyamakuru wa CNN yakomeje kugaragaza ko ashaka kubaza ariko Trump amwima amatwi, ahubwo aramubwira ati “ikigo cyanyu ni kibi cyane, mwe muri ‘fake news’.”

CNN ni ikinyamakuru kiri mu bikomeye cyane muri Amerika no ku isi, mu kwiyamamaza mu matora ya Perezida cyagaragaje ko kiri ku ruhande rwa Hillary Clinton.

Donald Trump yanavuze ko Politiki ya Obama care (ubwisungane mu kwivuza) azayivanaho nk’uko yabivuze yiyamamaza kuko ngo idafasha benshi mu buryo bukwiriye.

Yavuze kandi ko atakinaga ubwo yiyamamazaga avuga ko azubakisha urukuta rubatandukanya n’igihugu cya Mexique. Yavuze ko mu gihe cy’umwaka umwe n’igice azaba yarwubakishije, kandi ngo abo bakorana batangiye no kubiganiraho na Mexique, ngo ni nayo izarwiyubakira bo yenda bakayishyura.

Trump yabwiye abanyamakuru ko atakizera inzego z’iperereza kuko ibyazo bigera mu itangazamakuru bikiba, ngo nta banga ry’akazi zifite.

Atanga urugero rw’uburyo yagiye mu nama nazo nta muntu n’umwe bakorana abwiye (kuko yibwiraga ko yenda ari bo batanga amakuru) ariko yaba agisohoka muri iyo nama agasanga byageze mu itangazamakuru.

Ati “Izo nzego wazizera ute?”

Yavuze ko mu minsi 90 azabona raporo yose ijyanye na ‘hacking’ yakorewe Amerika, akayitangaza.

    Facebook Twitter Addthis
Ibitekerezo
  • MyPassion

    Natacha
    12 January 2017 - Musubize

    Trump bizamunanira kuba prezida, kuko si umunyapolitike ahubwo ni umucuruzi. Jye mbona hari n’igihe kizagera akicuza icyatumye yinjira mu matora kugeza ubwo atowe. Kuko ahantu a fitting a ni muri business.

Tanga Igitekerezo