Umuntu wa kane bamusuzumye basanga afite virusi ya Ebola mu mujyi wa Goma mu burasirazuba bwa Repubilika ya Demokarasi ya Congo.

Sponsored Ad

Iki cyorezo kimaze guhitana abantu barenga 1800 kuva cyakwaduka mu kwezi kwa munani umwaka ushize mu burasirazuba bwa Kongo mu Ntara ya Kivu ya ruguru.

Uyu muntu wa kane, ni umugore w’umugabo wishwe n’iyi ndwara kuwa gatatu w’iki cyumweru.

Umwana wabo umwe nawe muri iki cyumweru bamusanzemo indwara ya Ebola. Yari uwa gatatu.

Ikibazo cy’icyorezo cya Ebola gikomeje gutera ubwoba RDC n’u Rwanda rwasabye abaturage kwirinda kwerekeza mu mujyi wa Goma.

Abashinzwe ubuzima ku mpande z’ibihugu byombi, bakomeje ibikorwa byo gusuzuma urujya n’uruza rw’abantu no gukingira abantu bugarijwe kurusha abandi.

Urukingo ruri mu igerageza rumaze guhabwa abantu bose hamwe muri aka karere barenga 180,000 kandi rugaragaza ko rukora.

Mushiki w’umugabo wa mbere basanzemo indwara ya Ebola i Goma yahise ahunga aka gace, aza kuboneka mu yindi ntara. Abashinzwe ubuzima bavuga ko abandi bantu 40 bakoranyeho nawe babonetse.

Virus ya Ebola ikwirakwira mu gihe umuntu akoze ku matembabuzi y’umuntu uyirwaye, abaganga bavuga ko umuntu ashobora kugira iyi virus mu gihe cy’iminsi 21 ataratangira kuyirwara.