skol
fortebet

Umunyamasengesho wa Trump ari gutakamba,Imyigaragambyo irakomeje,-Menya amakuru ariho ubu mugihe hari kubarurwa amajwi[AMAFOTO]

Yanditswe: Thursday 05, Nov 2020

Sponsored Ad

skol

Umukandida w’Abademokarate Joe Biden imibare yerekanye ko yizeye gutsinda muri leta ya Michigan, aho Biden yahise agira ati: "nta kabuza tuzatsinda".

Sponsored Ad

Donald Trump yatangije intambara y’amategeko aregera inkiko muri leta enye ngo zihagarike kubara amajwi kuko birimo uburiganya, gusa nta bimenyetso aragaragaza bihamya ibyo.

’Umunyamasengesho’ wa Trump ari gutakamba

Umuvugabutumwa Paula White-Cain, akaba n’umujyanama mu by’ukwemera wa Perezida Donald Trump, yayoboye amasengesho akomeye yo gutakambira Imana ngo Trump yongere atorwe.

By’umwihariko, mu gusenga kwe yibanze kucyo yise "amatsinda ya sekibi ari kugerageza kwiba amajwi ya Trump".

Video ngufi ya Madamu Paula ari gusenga yakwiriye henshi ku mbuga nkoranyambaga - cyane cyane kuko abantu bategereje ibiva muri leta zikiri kubara amajwi.

Kuba imbere kwa Trump muri Pennsylvania kwagabanutse

Imibare ya nyuma irerekana ko uburyo Donald Trump ejo yari ari imbere muri Pennsylvania, leta y’isibaniro ry’amatora, byagabanutse.

Kugeza saa moya n’igice z’igitondo cya none ku isaha yo mu Burundi no mu Rwanda, kuri 90% y’amajwi yari amaze kubarwa Trump yari imbere ya Joe Biden ho amajwi 164,414.

Mu gihe kuwa gatatu nimugoroba Trump yari imbere ya Biden ho amajwi 379,639

Pennsylvania igira amajwi 20 ya ’electoral college’, ibi bituma ihinduka leta ikomeye muri aya matora.

Iyi leta yatoye Abademokarate inshuro esheshatu ziheruka mbere y’uko mu 2016 ihindura igatora Trump.

Abarepubulikani bagumanye ubwiganze muri sena

Umwanya wa perezida uracyahatanirwa, ariko imyanya myinshi mu mutwe w’abadepite n’uwa sena yamaze kubona beneyo, kandi nta cyahindutse kinini.

Abademokarate bifuzaga ubwiganze muri sena, bashakaga nibura kwambura imyanya ine Abarepubulikani, ariko ubu bisa n’aho babashije gufatamo umwe.

Mu mutwe w’abadepite naho urebye nta kinini cyahindutse, Abademokarate baragumana ubwiganze, Abarepubulikani nta mwanya n’umwe mushya bahabonye.

Imyigaragambyo i Philadelphia n’i Phoenix



Mu gihe bari kubara amajwi, amagana y’abantu bigabije imihanda mu mujyi wa Philadelphia muri Pennsylvania basaba ko "buri jwi ryose rigomba kubarwa".

Ni mu gihe Perezida Trump yamaze gutanga ibirego bisaba ko kubara amajwi bihagarara muri iyi leta no muri Wisconsin, Michigan, na Georgia.

Umunyamakuru wa BBC uri i Philadelphia avuga ko nta rugomo ruri muri iyi myigaragambyo y’abashyigikiye Joe Biden, bizeye ko amajwi ari kubarwa amuha amahirwe.

Imyigaragambyo kandi yadutse muri leta ya Arizona imbere y’ahari kubarirwa amajwi mu ntara ya Maricopa - inarimo umujyi mukuru wa Phoenix, aho basanzwe bakunze gutora Abarepubullikani.

Abashyigikiye Trump baje kwigaragambya hano babonye amakuru adafite gihamya ku mbuga nkoranyambaga ko batari kubara amajwi ya Trump.

Hitabajwe abashinzwe umutekano, gusa ababara amajwi ntibahagaritse akazi kabo.

Haracyari kare kumenya uza gutsinda muri iyi leta aho kugeza mu ijoro ryacyeye bari bamaze kubara 82% by’amajwi, Biden ari imbere ho gato ya Trump.

Tari tari muri Nevada

Umwe mu bigaragambya muri Nevada yahagaritse ikiganiro n’abanyamakuru

Amaso menshi kandi muri aya matora ahanzwe leta Nevada, ifite amajwi atandatu y’intumwa zitora, hano imibare ya Trump na Biden iregeranye cyane.

Mu kiganiro n’abanyamakuru i Las Vegas umujyi munini muri Nevada, uwigaragambya yasimbutse imbere ya camera atera hejuru ati: "Umuryango wa Biden uri kwiba aya majwi! Itangazamakuru riri kubihisha!".

Abategeka iyi leta bavuze ko andi majwi ava muri Nevada atangazwa uyu munsi kuwa kane saa mbiri z’ijoro ku masaha yo mu Burundi no mu Rwanda.

Ku majwi 85% amaze kubarwa, imibare ya BBC irerekana ko Biden ari imbere ya Trump ho amajwi 7,647 gusa.

Biden yavuze ko afite amajwi atarigeze abonwa n’undi mukandida

Joe Biden yavuze ijambo ryumvikanamo kwigirira icyizere, ati: "Ntabwo nje kuvuga ko natsinze amatora. Ariko ndi hano ngo mbabwire ko kubara nibirangira, twizeye ko tuba twatsinze".

Hari leta nyinshi zikiri kubara, gusa Biden yavuze ko yamaze kubona amajwi atarigeze abonwa n’undi mukandida uwo ariwe wese mu matora nk’aya.

Biden avuga ko afite ikizere ko kubara amajwi nibirangira ari we uba watsinze

Ibyo ni ukuri - Kugeza saa mu tanu (GMT) mu ijoro ryo kuwa gatatu, Biden yari amaze kubona amajwi miliyoni 70,5 yamutoye - mu gihe Trump yari afite miliyoni 67.2.

Uwahoze ari Perezida Barack Obama niwe wari ufite umuhigo w’amajwi menshi ya rubanda - mu 2008 yatowe yagize amajwi miliyoni 69.5

Birumvikana ko amajwi yiyongera kubera ubwiyongere bw’abatuye Amerika, ibyo na Trump yabyungukiyemo kuko kugeza ubu amaze kubona amajwi ya rubanda aruta ayo yabonye mu 2016.

Gusa muri Amerika amajwi ya rubanda siyo yemeza uwatsinze, ahubwo amajwi agenerwa buri leta, yose hamwe akaba ari 538, utsinda ni ugira 270.

Uko bihagaze ubu... birakomeza guhinduka...

Inkuru ya BBC

Ibitekerezo

  • N
    Ndabona Joe Biden ariwe uzatsinda aya matora

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa