Umwarimu ukomoka muri Kenya witwa Peter Tabichi waherukaga gutorwa nka mwarimu mwiza kurusha abandi ku isi mu ntangiriro z’uyu mwaka yahuye na Perezida Donald Trump wa Amerika mu biro bye White House.

Sponsored Ad

Uyu mwarimu ari muri Amerika aho kandi azageza ijambo ku nama rusange y’umuryango w’abibumbye i New York muri uku kwezi.

Tabichi ni umwarimu w’umufurere w’umufaransiskani, muri Werurwe yatsindiye igihembo kitwa ’2019 Global Teacher Prize’ gihabwa umwarimu wahize abandi ku isi.

Yigisha amasomo ya siyansi ku ishuri ryisumbuye rya Keriko mu gace ka Nakuru mu burengerazuba bwa Kenya.

Ifoto y’uyu mwarimu ari kumwe na Perezida Trump mu biro bye yashyizwe kuri Twitter n’umunyamabanga ushinzwe itangazamakuru w’ibiro bya perezida.

Uyu yanditse kandi ko "Furere Tabichi yatanze 80% by’umushahara we mu gufasha abakene iwabo muri Kenya.

"Ubwitange bwe no gukora cyane byatumye abanyeshuri be bo mu ishuri ridafite ubushobozi buhagije baba aba mbere mu irushanwa rya siyansi mu gihugu.

Furere Tabichi w’imyaka 36, biteganyijwe ko azabwira inama rusange y’umuryango w’abibumbye uko yabashije kugera ku ntego ze mu mwuga we wo kwigisha.

Inkuru ya BBC