Umugabo witwa Connor Betts warashe abantu mu mujyi wa Dayton muri Leta ya Ohio muri Amerika yishe mushiki we n’abandi bantu umunani mu kurasa abantu byamaze amasegonga 30 mu ijoro ryo kuwa Gatandatu rishyira ku cyumweru taliki ya 04 Kanama 2019, nk’uko polisi ibivuga.

Sponsored Ad

Polisi yahise itabara ako kanya, itangira kurasa kuri Connor Betts w’imyaka 24 wariho arasa mu bantu, ndetse ashaka no kwinjira mu kabari ahari benshi kurushaho.
Richard Biehl, umuyobozi wa polisi ya Dayton avuga ko iyo uyu mugabo ashobora kwinjira muri aka kabari abantu benshi bari kuhashirira.

Mushiki we, Megan Betts w’imyaka 22 ari mu bishwe n’amasasu yarashe.

Bwana Biehl avuga ko uyu mushiki we atari we yarashe mbere ariko ari mu bantu ba mbere yishe.

Kugeza ubu bavuga ko nta mpamvu ziramenyekana zamuteye gukora ibi.
Ibitaro biri hano hafi byakiriye abantu 27 bo kuvura, 15 bahise basezererwa kuko batakomeretse bikomeye.

Muri izi mpera z’icyumweru gishize, abantu bagera kuri 29 bishwe barashwe n’abantu bitwaje imbunda babasanze aho bari ari benshi mu mijyi ya El Paso muri Texas na Dayton muri Leta ya Ohio, mu gihe kitageze ku masaha 24.

Inkuru BBC