addresiya
Kigali
startimes

Abarundi baramukiye mu matora yo gushaka umusimbura wa Nkurunziza Pierre umaze imyaka 15 ku butegetsi….Imbuga nkoranyambaga zafunzwe

Amakuru   Yanditswe na: Dusingizimana Remy 20 May 2020 Yasuwe: 2062

Kuri uyu wa 20 Gicurasi 2020,Abarundi bari imbere mu gihugu babyukiye mu matora y’umukuru w’igihugu aho abakandida 7 bari guhatanira intebe yari imaze imyaka 15 yicayeho Pierre Nkurunziza.



Nubwo abiyandikishije kuri lisite y’itora bose ari 5,126,352, ariko abazwi ko bajya gutora bangana na 5,113,418.

Mu minsi ishize nibwo Komisiyo y’amatora mu Burundi [CENI] yatangaje ko Abarundi bari hanze bangana na 12,933 badashobora gutora kubera coronavirus.

Amabwiriza ya CENI avuga ko mu gutora, umuntu wese agomba guhabwa impapuro 3, urwa 1 ruriho abiyamamaza ku mwanya w’umukuru w’igihugu,urwa 2 ruriho abiyamamaza mu nteko ishinga amategeko, urwa gatatu ruriho abiyamamaza kuyobora za komine.

Aya matora yabaye amashyirahamwe mpuzamahanga avuga ko nta ndorerezi mpuzamahanga zihari.

Ibi byavuzwe nyuma y’aho indorerezi zatanzwe n’umuryango w’ibihugu bya Afrika y’Amajyepfo zibwiwe ko zitazitabira iki gikorwa kubera ikiza cya coronavirus.

CENI yo ivuga ko hari indorerezi mpuzamahanga 53 zemerewe gukurikirana amatora, abo nabo bakaba ari abakozi ba za Ambasade z’ibihugu bya Tanzania, Misiri, Ubushinwa, Kenya, Afrika y’Epfo, Republika Iharanira Demokarasi ya Congo, Nigeria, Uburusiya n’umuryango w’ubumwe bw’ibihugu bya Afrika.

Aba bakandida bose uko ari 7 bagomba kubona amajwi 50 ku ijana,bose bagiye munsi yayo haba ikiciro cya kabiri.

Imibare y’ibanze y’ibyavuye mu matora bizatangazwa kuwa 25/05/2020.

Hari ibice bimwe byo mu mu mujyi wa Bujumbura kugeza saa kumi n’ebyiri byari bitarafungurwa kubera impamvu zitandukanye.

Aho ni nko muri Zone Musaga ahavugwa ko hari ibikoresho na twa tuzu tw’umwiherero tutari twakahagera, kandi n’abakozi bahagarariye amatora batari bakabonye ya wino isigwa ku rutoki rw’uwatoye.

Umuvugizi wa CENI Philippe Nzobonariba yavuga ko gutinda gufungura site z’amatora hamwe na hamwe byatewe n’akazi kenshibagize ku mugoroba w’ejo, cyane ko umujyi wa Bujumbura ugizwe n’amakomine atatu gusa.

Amakuru ava mu Burundi aravuga ko imbuga Nkoranyambaga zafunzwe mu gihugu.

Bamwe mu bakoresha imbuga nka Whatsapp, Facebook, Twitter na Instagram bavuga ko badashobora kwinjira kuri izo mbuga.

Ibyo byari bimaze iminsi binugwanugwa ko uburyo bwo gutumatumanaho hakoreshejwe imbuga Nkoranyambaga bushobora guhagarikwa kuri uyu munsi w’amatora.

Umwe mu banyamakuru ukorera mu Burundi yabwiye BBC ko imbuga Nkoranyambaga zose zidakora avuga ko ari ikintu gitangaje kandi kirimo kirica akazi kabo.

Agira ati: "Benshi vyadutangaje cane rwose twibaza impamvu ibi biba ku munsi w’itora".

Kugeza ubu leta ntacyo iratangaza ku ifungwa ry’imbuga nkoranyambaga.

Abanyamakuru bavuga ko ahenshi Abarundi bagiye gutora barimo gukurikiza bimwe mu bisabwa mu kwirinda icyorezo cya Covid-19.

Ku biro bitari bike mu gihugu, abaturage babanje gukaraba mbere yo gutora gusa hari aho, byagoranye nko mu makomine amwe n’amwe y’intara ya Bujumbura aho usanga nta mazi yo gukaraba ahari, n’abantu basuhuzanya ntacyo bikanga.

Kugeza uyu munsi,mu Burundi abamaze kwandura Covid-19 ni 42, abakize ni 20, uwapfuye ni umwe.

Muri aya matora, indorerezi ziserukiye amashyirahamwe atandukanye yo hagati mu gihugu, nka MAC, Fontaine Isoko, CECAB n’ayandi niyo ari gukurikirana aya matora.Hari abahagarariye abiyamamaza babonetse ku biro by’itora.

Abenshi bakaba ari abahagarariye amashyaka nka CNDD-FDD, CNL na Uprona, n’ubwo uyu wa nyuma hari aho utaboneka,nko ku biro by’itora byo ku ishuri rya ECOFO Buye,rya komine Mwumba mu ntara ya Ngozi.

Abakandida 7 nibo bari guhatana muri aya matora ya Perezida barimo General Evariste Ndayishimiye uhagarariye ishyaka CNDD FDD rya Perezida Nkurunziza, Agathon Rwasa wa CNL, Gaston Sindimwo wo mu Ishyaka Uprona, Léonce Ngendakumana w’ishyaka Sahwanya Frodebu, abakandida bigenga Francis Rohero na mugenzi we Dieudonné Nahimana ndetse na Domitien Ndayizeye wayoboye u Burundi kuva mu 2003 kugeza 2005 uhagarariye ihuriro Kira Burundi.

Abiyamamariza kwinjira mu nteko ishinga amategeko y’u Burundi basaga 100.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?
    Log in

    Amategeko n'amabwiriza birkurikizwa


Inzindi nkuru

Burundi: Haratangazwa amajwi y’ibanze y’ibyavuye mu matora adateye amatsiko...

Uyu munsi saa Munani z’amanywa, komisiyo ishinzwe amatora mu Burundi...
25 May 2020 Yasuwe: 1486 1

Burundi: Evariste Ndayishimiye yatangiye kwigaranzura abandi mu majwi...

Ibyavuye mu matora by’agateganyo byari bitegerejwe kuwa mbere cyangwa kuwa...
22 May 2020 Yasuwe: 6915 0

Burundi:Perezida Nkurunziza yagiye gutora uzamusimbura agenda ku igare...

Perezida Pierre Nkurunziza w’u Burundi yakoze udushya ku munsi w’ejo ubwo...
21 May 2020 Yasuwe: 7734 0

Abarundi baramukiye mu matora yo gushaka umusimbura wa Nkurunziza Pierre...

Kuri uyu wa 20 Gicurasi 2020,Abarundi bari imbere mu gihugu babyukiye mu...
20 May 2020 Yasuwe: 2062 0

Burundi: Gen Ndayishimiye Evariste natorwa azihakana P. Nkurunziza ahindure...

Ese Gen Evariste Ndayishimiye natorerwa kuyobora u Burundi azabasha...
17 May 2020 Yasuwe: 7812 0

Barack Obama yongeye kunenga perezida Donald Trump mu ruhame

Barack Obama wahoze ari Perezida wa Leta Zunze Ubumwe z’Amerika yongeye...
17 May 2020 Yasuwe: 2039 0