Lt. Gen. (Rtd) Henry Tumukunde, uteganya kwiyamamariza umwanya w’umukuru w’igihugu mu matora ataha, yahamagajwe n’ Ishami rishinzwe ubugenzacyaha (CID) mu Gipolisi cya Uganda ngo yitabe ku biro byaryo i Kibuli kuri uyu wa Gatatu kandi nta kwibeshya ngo abure.

Sponsored Ad

Urupapuro rumuhamagaza rwashyizweho umukono na Grace Akullo ukuriye CID, kopi ihabwa Umugaba mukuru wa UPDF, Gen. David Muhoozi, n’Umukuru w’Igipolisi, IGP Okoth Ochola n’umwungirije, Maj. Gen. Sabitti Muzeeyi.

Umuyobozi wa CID, Akullo avuga ko bari gukora iperereza kuri Gen. Tumukunde ku bintu bitandukanye ku buryo akenewe ngo ahatwe ibibazo ku nama yagiranye n’abahoze mu gisirikare ndetse anakoreshwe inyandikomvugo. Yagize ati:

Ubuyobozi (bwa CID) buri gukora iperereza, ku kuba inshuro nyinshi mu biro byawe no mu rugo hose muri Kololo, n’ahandi hantu mu gihugu, waragiranye inama n’abahoze mu gisirikare muganira ku bibazo bifitanye isano na politiki.

Igipolisi kiravuga ko ibikorwa bya Tumukunde, nibiramuka bibaye ukuri, bizaba bihabanye n’ingingo z’Itegeko nshinga ryo mu 1995 n’amategeko agenga Igisirikare cya Uganda (UPDF). Kubw’ibyo, Akullo yagize ati:

Hakurikijwe ingingo ya 27A y’amategeko agenga igipolisi…uhamagajwe kwitaba ku biro bikuru bya CID ku itariki 19 Kanama 2020.

Amakuru avuga ko ku wa Kabiri Gen. Tumukunde wahoze ari Minisitiri w’Umutekano ndetse wigeze kuba umuyobozi w’inzego z’ubutasi, yatawe muri yombi afungirwa akanya gato kuri station ya police ya Njeru nyuma yo kumusanga akoresha inama muri aka gace.