Abaherwe batunze za miliyari z’amadolari nka Elon Musk, Jeff Bezos na Bill Gates ni bamwe mu bakomeye benshi bo muri Leta Zunze Ubumwe z’Amerika baraye bibasiwe n’abiba amabanga kuri mudasobwa (hackers), mu gisa n’ubushukanyi bw’amafaranga yo mu ikoranabuhanga (bitcoin).
Konti za Twitter za Barack Obama wahoze ari Perezida w’Amerika, Joe Biden uzahatanira umwanya wa perezida uyu mwaka ahagarariye ishyaka ry’abademokarate ndetse n’umuhanzi Kanye West, nazo zasabye inkunga yo mu muri ayo mafaranga (...)

Sponsored Ad

Abaherwe batunze za miliyari z’amadolari nka Elon Musk, Jeff Bezos na Bill Gates ni bamwe mu bakomeye benshi bo muri Leta Zunze Ubumwe z’Amerika baraye bibasiwe n’abiba amabanga kuri mudasobwa (hackers), mu gisa n’ubushukanyi bw’amafaranga yo mu ikoranabuhanga (bitcoin).

Konti za Twitter za Barack Obama wahoze ari Perezida w’Amerika, Joe Biden uzahatanira umwanya wa perezida uyu mwaka ahagarariye ishyaka ry’abademokarate ndetse n’umuhanzi Kanye West, nazo zasabye inkunga yo mu muri ayo mafaranga yo mu ikoranabuhanga.

Ubutumwa bwo kuri Twitter bwa konti ya Bwana Gates bugira buti: "Buri muntu wese ari kunsaba kugira icyo nanjye nitura ku neza nagiriwe".

"Ohereza amadolari 1,000, nanjye ndakoherereza amadolari 2,000".

Kompanyi ya Twitter ivuga ko kwinjirirwa muri mudasobwa ku bakozi bayo ari byo byateje iki cyabaye kimwe mu guhungabana gukomeye cyane k’umutekano wayo kuva yashingwa mu 2006.

’Igitero cy’urusobe giteguranye ubuhanga’

Mu ruhererekane rw’ubutumwa bwo kuri Twitter, iyi kompanyi yatangaje ko cyari "igitero cy’urusobe giteguranye ubuhanga" kigambiriye abakozi bayo "bafite uruhushya rwo gukoresha ibikoresho n’amakuru by’imbere".

Twitter yagize iti: "Tuzi ko bakoresheje uru ruhushya mu kwigarurira konti nyinshi zigaragara cyane (zirimo n’izifite ikimenyetso ko zagenzuwe) bagatangaza ubutumwa mu izina ryazo".

Yongeyeho ko yafashe "ingamba zikomeye" mu kugabanya abagira uruhushya kuri ayo makuru n’ibikoresho by’imbere, kandi ko iperereza rikomeje.

Hagati aho, ku rubuga rwe rwa Twitter, Jack Dorsey, umuyobozi mukuru wa kompanyi ya Twitter, ku munsi w’ejo ku wa gatatu yaranditse ati:

"Uyu munsi wadukomereye twe hano muri Twitter. Twese tubabajwe cyane n’ibi byabaye".

Bwana Dorsey yongeyeho ati: "Turi kwiga ku cyabaye kandi tuzatangaza buri kintu cyose dushoboye igihe tuzaba tumaze gusobanukirwa neza icyabaye nyirizina".

Ingamba yihutirwa y’ubwirinzi

Mbere yaho ku munsi w’ejo, Twitter yari yafashe ingamba idasanzwe kuri konti zifite ikirango cy’ubururu - kigaragaza izagenzuwe neza neza ko ari iza ba nyirazo nyirizina - izibuza kugira icyo zitangaza na kimwe.

Ndetse n’ubusabe bwo guhindura ijambo ry’ibanga (password/mot de passe) bwari bwanze, naho bumwe "mu buryo bw’imikorere" bw’izindi butagikora.

’Ubujura bwa mbere bubi cyane ku rubuga nkoranyambaga rukomeye’
Ahagana saa munani n’iminota 30 zo mu ijoro ryakeye, ku isaha yo mu Rwanda no mu Burundi, abakoresha izo konti za Twitter zigenzuwe bongeye gushobora kugira icyo batangaza kuri Twitter, ariko kompanyi ya Twitter ivuga ko ikiri gucyemura icyo kibazo.

Dmitri Alperovitch, washinze kompanyi CrowdStrike y’ubwirinzi bwo kuri internet, yabwiye ibiro ntaramakuru Reuters ati:

"Ibi bisa nkaho ari bwo bujura bwo kuri mudasobwa bwa mbere bubi cyane bubayeho kugeza ubu ku rubuga nkoranyambaga rukomeye".

Umunyamakuru wa BBC Joe Tidy ukurikiranira hafi amakuru y’umutekano wo ku mbuga za internet avuga ko hari amakuru avuguruzanya ku ngano y’amafaranga abo bashukanyi bo kuri internet bashoboye gutwara muri icyo gihe bari bigaruriye zimwe muri konti zo kuri Twitter.

Uyu munyamakuru avuga ko bizagorana cyane kugaruza ayo mafaranga yo mu ikoranabuhanga, ndetse ko kompanyi ya Twitter igomba kwitegura uruhuri rw’ibibazo izabazwa n’abarakajwe n’ibyabaye, bayisaba kwisobanura ku kuntu byashobotse.

Mu mwanya muto konti zibasiwe zamaze zigaruriwe, ’link’ yari mu butumwa bwa Twitter yahawe imfashanyo n’abantu babarirwa mu magana, batanze arenga ibihumbi 100 by’amadolari (arenga miliyoni 100 mu mafaranga y’u Rwanda), nkuko imibare ya ’blockchain’ ibigaragaza.

FBI yaburiye abantu

Konti za Twitter zibasiwe zose zifite abazikurikira babarirwa muri za miliyoni.

Mu mwaka ushize wa 2019, konti nyirizina y’umuyobozi mukuru wa Twitter Jack Dorsey yarinjiriwe, ariko iyi kompanyi nyuma iza gutangaza ko yacyemuye icyo kibazo cyari cyabayeho.

Ibiro by’urwego rw’ubutasi bw’imbere muri Amerika (FBI) rwo mu mujyi wa San Francisco aho Twitter ifite icyicaro, byasohoye itangazo ejo ku wa gatatu rivuga kuri icyo gitero cyo kuri mudasobwa.

Rigira riti: "Bigaragara ko konti zinjiriwe mu rwego rwo kugira ngo ubushukanyi bw’amafaranga yo mu ikoranabuhanga bukomeze".

"Turasaba abaturage kutakwaga muri uyu mutego w’ubushukanyi ngo bohereze amafaranga yo mu ikoranabuhanga cyangwa amafaranga [asanzwe]..."

Ubutumwa bwo kuri Instagram bwigamba igitero

BBC yabwiwe n’umukozi wo mu rwego rw’umutekano ko aderesi yo ku rubuga rwa internet ya cryptoforhealth.com, ari yo ubutumwa bumwe bw’abashukanyi kuri Twitter bwoherezagaho abantu, yari yashyizweho n’umujura wo kuri internet ukoresha aderesi ya email ya [email protected].

Izina rya "Anthony Elias" ni ryo ryifashishijwe mu kwandikisha urwo rubuga rwa internet.

Cryptoforhealth inakoreshwa kuri Instagram, bisa nkaho yandikishijwe kuri Instagram mu gihe kimwe n’ubwo bujura bwo kuri internet.

Mu mwirondoro w’iyo konti kuri Instagram handitse ngo "Bari twebwe", iruhande rwawo hari agashusho ko mu maso hamwenyura.

Iyo konti yo kuri Instagram yanatangaje ubutumwa igira iti:

"Cyari igitero kigamije ubufasha. Amafaranga yanyu azagezwa ahantu hakwiye".

Inkuru ya BBC