skol
Kigali
startimes

Kanye West yemeye nta mananiza ko yatsinzwe mu matora ya Perezida wa Amerika

Amakuru   Yanditswe na: Martin Munezero 9 November 2020 Yasuwe: 4233

Uyu muraperi w’imyaka 43 yemeye ko yatsinzwe nyuma yuko ishyaka rye yise ‘Birthday Party’ ribonye amajwi 60,000 gusa mu majwi agera kuri miliyoni 160 yose hamwe ryashoboraga kubona.


Madamu Jo Jorgensen, undi mukandida wigenga wo mu ishyaka ‘Libertarian Party’, we yigaragaje kumurusha – abona amajwi arenga miliyoni 1,5.

Ariko, ibya politike kuri West bishobora kuba bitarangiriye hano. Kuri Twitter, yanditse ati: “Kanye 2024”, aca amarenga yuko azongera kwiyamamaza.

Muri uku kwiyamamariza kuba perezida kwe kwa mbere, West yagaragaye ku mpapuro z’itora muri leta 12, mu zindi nyinshi ntiyubahiriza itariki ntarengwa yo gutanga ibyangombwa.

Amajwi menshi muri ayo yabonye – amajwi 10,188 – yayabonye muri leta ya Tennessee izwiho gutora abakandida b’abarepubulikani.

Mu kwezi kwa karindwi ubwo yatangiraga kwiyamamaza, yabwiye ikinyamakuru Forbes ko mu ntego ze z’ingenzi harimo guhagarika ibikorwa by’urugomo bikorwa na polisi.

Yanavuze ko yari kwibanda ku kurinda Amerika binyuze ku “gisirikare gikomeye” cyayo.

Ndetse no gusukura “mu mubavu [deodorant] twitera, mu muti wo kogesha amenyo” ibinyabutabire (chemicals) bishobora kugira ingaruka ku buzima.

Yagize ati: “Kubera ko igihe tuzatsinda, kizaba ari [kizahinduka] umunsi mukuru w’amavuko kuri buri muntu wese”.

Ariko kandidatire ye yaranenzwe cyane – ndetse bamwe bagaragaza impungenge ku buzima bwe bwo mu mutwe ubwo yariraga mu kwiyamamaza.

Ku rundi ruhande, Madamu Jorgensen yiyamamaje mu buryo burushijeho kuba nk’ubusanzwe ku mukandida wigenga, ajya mu bice bitandukanye by’igihugu ashaka abo kumushyigikira, amenyekanisha amatwara ye y’ubwisanzure – agamije leta nto n’ubwisanzure bwa buri muntu.

Madamu Jorgensen ni we mugore wa mbere wemejwe nk’umukandida wigenga w’ishyaka rya Libertarian

Uyu mwarimu w’imyaka 63 wigisha isomo ry’imitekerereze n’imyitwarire ya muntu kuri Kaminuza ya Clemson, yabaye umugore wa mbere wemejwe nk’umukandida mu ishyaka ‘Libertarian Party’ ndetse abona amajwi ya kabiri menshi cyane abayeho mu mateka yaryo, nkuko bitangazwa n’ibiro ntaramakuru Associated Press.

Mu itangazo yasohoye, Madamu Jorgensen yagize ati: “Abashyigikiye ishyaka rya Libertarian bazakomeza kwiyongera. Uburyo bumwe gusa abademokarate n’abarepubulikani bashobora kutugumisha hasi ni uko bagendera ku ngamba zacu”.

Ishyaka rya Libertarian ryatangiye muri Amerika mu myaka ya 1970, ariko umukandida waryo nta na rimwe araba perezida.

Mu bakandida bigenga, uwabaye uwa kabiri mu majwi agakurikira Madamu Jorgensen ni Howie Hawkins wo mu ishyaka rya ‘Green Party’, wagize amajwi arenga 339,000 mu gihugu.

Ariko abo bakandida batatu si bo bonyine bari bagerageje amahirwe yabo muri uyu mwaka wa 2020 – habe na gato. Bari mu bandi bakandida barenga 1,200 uyu mwaka bari bagejeje ibyangombwa byabo mu kanama k’amatora.

Author : Martin Munezero

Munezero Martin ni Umwanditsi w’Ikinyamakuru Umuryango. Yatangiye gukorera iki kinyamakuru muri Nzeli 2014.

Imbuga nkoranyambaga ze:

Instagram:Martin Promoter
Facebook:Munezero Martin
Twitter :Martin Promoter

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Myanmar: Perezida Suu Kyi wakuwe ku butegetsi agahita afungwa yerekanwe ku...

Muri Myanmar, umukuru w’igihugu, Aung San Suu Kyi, wahiritswe ku butegetsi...
1 March 2021 Yasuwe: 4614 0

Donald Trump yashinje Joe Biden umaze ukwezi kumwe ku butegetsi gusubiza...

Donald Trump yatangaje ko nta migambi afite yo gushinga ishyaka ryishya...
1 March 2021 Yasuwe: 4053 0

Imwe mu myanzuro yafatiwe mu nama ya 21 yahuje abakuru b’ibihugu bya...

Kuri uyu wa Gatandatu tariki ya 27 Gashyantare 2021 nibwo habaye inama ya...
27 February 2021 Yasuwe: 5380 0

US yemeje ko Mohammed bin Salman wa Saudi Arabia ari we watanze uruhushya...

Raporo y’ubutasi bw’Amerika yasanze igikomangoma Mohammed bin Salman wa Saudi...
27 February 2021 Yasuwe: 3612 0

Inama y’abakuru b’ibihugu ya EAC igiye guterana ku nshuro ya 21 yiga ku...

Kuri uyu wa Gatandatu tariki ya 27 Gashyantare 2021 hazaba inama izahuza...
26 February 2021 Yasuwe: 3428 0

Amerika yatangaje ko yavuganye n’inzego zo hejuru cyane mu Rwanda ku rubanza...

Kuri uyuwa kane tariki ya 25 Gashyantare 2021, ibiro bishinzwe ububanyi...
26 February 2021 Yasuwe: 8473 0