Bah Ndaw, Perezida w’inzibacyuho wa Mali, yashyizeho guverinoma y’abaminisitiri 25, muri yo abasirikare bakuru bafashe imyanya myinshi ikomeye.

Sponsored Ad

Mu iteka rya perezida ryasomewe kuri televiziyo ya leta, minisiteri y’ingabo, iy’umutekano, iy’ubutegetsi n’iy’ubwiyunge zahawe abakoloneri bo mu gisirikare.

Ukuriye agatsiko k’abasirikare kahiritse ubutegetsi ni we ubwe watoranyije Bwana Ndaw - nawe wabaye mu ngabo zirwanira mu kirere - ngo aze abe perezida.

Nyuma y’uko bashyizeho na minisitiri w’intebe w’umusiviri, umuryango w’ibihugu byo mu burengerazuba bwa Afurika, ECOWAS/CEDEAO, biteganyijwe ko ukuraho ibihano byari byafatiwe Mali nyuma yo guhirika ubutegetsi mu kwezi kwa munani.

Col Sadio Camara, umwe mu bari bakuriye agatsiko kahiritse ubutegetsi, yagizwe minisitiri w’ingabo, naho uwari umuvugizi w’ako gatsiko Col-Maj Ismaël Wagué yagizwe minisitiri w’ubwiyunge.

Hari imyanya imwe ikomeye yahawe abasiviri, nk’aho uwahoze ari umushinjacyaha mukuru Mohamed Sidda Dicko yagizwe ukuriye ubucamanza.

Imyanya ine muri guverinoma ni yo yahawe abagore, ibiri ni yo yahawe abo ku ruhande rutavuga rumwe na leta rwitwa M5, ari narwo rwayoboye imyigaragambyo yatumye abasirikare bahirika Perezida Ibrahim Boubacar Keïta.

Muri Kanama 2020 nibwo Umukuru w’igihugu cya Mali, Ibrahim Boubakar Keïta, yafashwe n’abasirikare bigometse ku butegetsi bwe nk’uko umuvugizi wa leta, Yaya Sangaré, yabibwiye BBC.

Kuwa 18 Kanama 2020,nibwo habaye ibikorwa byo gushaka gukuraho ubutegetsi,byatangiye haba kurasana mu nkambi ikomeye iri mu karere kitwa Kati ku birometero 15 uvuye ku murwa mukuru w’icyo gihugu Bamako.

Ku murwa mukuru, insoresore zateye inyubako ya leta.

Ibyo byabaye hashize amasaha make gusa igice cy’abasirikare cyigometse - aho abasirikare bakuru bahagaritswe n’abo basirikare bari barakaye.

Uko kwigomeka kwarunduye ku butegetse Keita wari unarwaye birangira abasirikare bafashe ubutegetsi.

Uku guhirika ubutegetsi kwamaganwe n’ Umuryango w’ibihugu bya Afrika y’uburengerazuba (CEDEAO/ECOWAS) hamwe n’u Bufaransa bwakoronije iki gihugu.

BBC