Perezida Nana Akufo-Addo wa Ghana yatorewe indi manda nyuma y’amatora yo ku wa mbere yabayemo guhatana gukomeye.

Sponsored Ad

Nyakubahwa Akufo-Addo yabonye amajwi 51.6% naho uwo bari bahatanye cyane John Mahama, wahoze ari Perezida, abona amajwi 47.4%, nkuko akanama k’amatora kabitangaje.

Bwana Mahama ntabwo aremera ko yatsinzwe. Iyo yari inshuro ya gatatu aba banyapolitike babiri bahatanye mu matora ya perezida.

Ghana izwiho kuba ari kimwe mu bihugu by’Afurika birangwamo demokarasi yashinze imizi.

Ibyavuye mu matora y’abagize inteko ishingamategeko ntabwo biratangazwa, ariko biteganyijwe ko bitangazwa vuba aha.

Ubwo hatangazwaga ko Bwana Akufo-Addo yatsindiye manda ya kabiri, abamushyigikiye bishimiye intsinzi bikomeye, nkuko bivugwa n’umunyamakuru wa BBC Thomas Naadi uri mu murwa mukuru Accra.

Uyu perezida watowe ubu agiye guhangana n’ikibazo cy’ukwiyongera cyane kw’abadafite akazi ndetse no kuzahura ubukungu bwazahajwe n’iki cyorezo cya coronavirus, nkuko uwo munyamakuru wacu akomeza abivuga.

Mbere yaho ku wa gatatu, polisi yavuze ko kuva ku wa mbere habayeho ibikorwa 21 by’urugomo rufitanye isano n’amatora, byahitanye ubuzima bw’abantu batanu.

Aya ni amatora ya perezida ya munani abayeho muri Ghana kuva itegekonshinga ry’iki gihugu ryavugururwa mu mwaka wa 1992.

Bwana Mahama yabaye Perezida wa Ghana imyaka ine, asimburwa na Perezida Akufo-Addo mu mwaka wa 2017. Inshuro zose Bwana Akufo-Addo yamutsinze, yagiye amutsinda bigoranye.

Kubera amabwiriza yo kwirinda coronavirus, kwitabiri mitingi ku bwinshi byari bisanzweho byarasubitswe.

Ahubwo, igihe kinini cyo kwiyamamaza amashyaka New Patriotic Party (NPP) rya Perezida Akufo-Addo na National Democratic Congress (NDC) rya Bwana Mahama, yakimaze ahatanira ku mbuga nkoranyambaga no kuri radio na televiziyo.

Ariko, mu minsi ya nyuma yo kwiyamamaza, kwigengesera byarirengagijwe ubwo abanyapolitike bahuraga n’imbaga y’ababashyigikiye. None ubu hari impungenge ko ubwandu bwa coronavirus bwaba bugiye kwiyongera.

Muri Ghana abanduye Covid-19 barenga 52,000, muri bo abarenga 300 yarabishe, nkuko imibare ya Kaminuza ya Johns Hopkins yo muri Amerika ibigaragaza.

BBC