Kigali

Perezida Trump yiyemeje kurangiza amakimbirane yo muri Afurika

Amakuru   Yanditswe na: Nsanzimana Ernest 13 July 2018 Yasuwe: 1808

Perezida Donald Trump wa Leta Zunze Ubumwe z’Amerika yasezeranyije ko agiye gufasha mu kurangiza amakimbirane yo ku mugabane w’Afurika arangwa n’ ubugome n’ubugizi bwa nabi.

Perezida Trump yagize ati: "Afurika kuri ubu ifite urusobe rw’ibibazo abantu bake bonyinye bashobora kwiyumvisha. Birababaje cyane, hari ubugizi bwa nabi n’urugomo."

Yavuze ko intego ye ari ukubaka igisirikare gikomeye cy’Amerika, hanyuma kikagarura amahoro ku isi.

Amerika isanzwe ikora mu bikorwa byo guhangana n’iterabwoba no guha imyitozo igisikare cyo mu bihugu bimwe na bimwe byo muri Afurika mu kurwanya intagondwa zigendera ku mahame akaze y’idini ya kisilamu mu karere k’ubutayu bwa Sahara.

Trump w’imyaka 72 y’amavuko, yavuze aya magambo ubwo yari mu kiganiro n’abanyamakuru i Buruseli mu Bubiligi muri iki cyumweru, aho yari mu nama y’iminsi ibiri y’ibihugu by’Uburayi n’Amerika bihuriye mu muryango w’ubwirinzi wa OTAN.

Muri iyi nama ibihugu bihuriye mu muryango OTAN byemeranyijwe ko bigiye kongera ingengo y’imari bitanga mu bikorwa bya gisirikare.
Bwana Trump yavuze ayo magambo ajyanye n’ibibazo by’Afurika nyuma yaho umunyamakuru wo muri Tuniziya yari amaze kumushimira kubera ibikorwa by’Amerika mu majyaruguru y’Afurika, ahakorera imitwe y’intagondwa zigendera ku mahame akaze y’idini ya kisilamu.
Bamwe mu bakoresha urubuga nkoranyambaga rwa Twitter bavuze ko amagambo ya Trump yaje akomeza gushimangira uburyo bamwe mu bo ku mugabane w’Uburayi n’Amerika bafata umugabane w’Afurika.

Umwe muri aba bakoresha urubuga nkoranyambaga rwa Twitter ni Elizabeth Merab, umunyamakuru w’Umunya Kenya, wavuze ko Bwana Trump yari yabaye nk’uwirengagiza ko Afurika igizwe n’ibihugu 54 bitandukanye mu miterere yabyo.

Undi ukoresha uru rubuga nkoranyambaga witwa Allan Golombek, we yavuze ko ubwicanyi buterwa no kurasana mu mashuri amwe yo muri Amerika, burimo ubugizi bwa nabi n’urugomo biri ku kigero kimwe n’amakimbirane ayo ari yo yose yo ku mugabane w’Afurika.

Umunyamakuru wa BBC Alastair Leithead ukurikiranira hafi inkuru zo muri Afurika, avuga ko Amerika ifite abasirikare barenga ibihumbi 7 ku mugabane w’Afurika, ikanagira ibigo 34 cyangwa ibindi bimeze nkabyo kuri uyu mugabane.

Yongeraho ko bishoboka ko Amerika ifite n’ibindi bigo bya gisirikare bigirwa ibanga biri ku mugabane w’Afurika.

Mu mwaka ushize wa 2017, abasirikare bane kabuhariwe b’Amerika biciwe mu mutego bari batezwe mu gihugu cya Niger.
Ni bo basirikare benshi Amerika yari itakaje mu gitero kibereye ku mugabane w’Afurika, nyuma yabo yatakaje muri Somalia mu myaka 25 ishize mu gikorwa cya gisirikare cyiswe "Black Hawk Down."

Author : Nsanzimana Ernest

Nsanzimana Ernest ni Umwanditsi mukuru w’Ikinyamakuru Umuryango. Yatangiye gukorera iki kinyamakuru muri Nzeli 2016, afite Impamyabumenyi y’Icyiciro cya Kabiri cya Kaminuza (A0) mu Itangazamakuru n’Itumanaho yakuye muri Kaminuza y’u Rwanda Ishuri ry’ itangazamakuru n’ itumanaho

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Madame Louse Mushikiwabo yagize icyo asaba Abanyepolitiki ba...

Umunyamabanga Mukuru w’Umuryango mpuzamahanga w’ibihugu bivuga ururimi rw’...
11 January 2019 Yasuwe: 2007 0

Perezida Kagame n’umufasha we ’Jeanette Kagame’ bambitswe imidali...

Ku mugoroba wo kuri uyu wa Gatatu, i Abidjan muri Côte d’Ivoire, Perezida...
20 December 2018 Yasuwe: 4066 0

Birangiye u Burundi bugiye kwitabira inama ya 20 y’abakuru b’ibihugu bigize...

Leta y’u Burundi yemeye ko izitabira Inama ya 20 y’Abakurub’Ibihugu bigize...
16 December 2018 Yasuwe: 4866 0

Amerika irashinja Ubushinwa n’Uburusiya kubohera Afurika mu madeni

Leta Zunze Ubumwe za Amerika zatangaje ko zigiye kureka ibikorwa...
14 December 2018 Yasuwe: 1393 0

Kongo: Komisiyo y’ amatora yafashwe n’ inkongi hasigaye iminsi 10 ngo...

Mu gitondo cyo kuri uyu wa Kane tariki 13 Ukuboza 2018 ibiro bya Komisiyo...
13 December 2018 Yasuwe: 2286 0

Dr Mukwege afite amakenga ko amatora ya Perezida wa Kongo azateza...

Umunyekongo uherutse kuronka igihembo kitiriwe Nobel, Dr Denis Mukwege,...
11 December 2018 Yasuwe: 1895 0