Abagize Inteko Ishinga Amategeko umutwe w’Abadepite muri Leta Zunze Ubumwe za Amerika batoye icyemezo cyo kweguza Perezida w’iki gihugu Donald Trump bamushinja kuba nyirabayazana w’imyigaragambyo yibasiye inyubako bakoreramo izwi nka ‘Capitol’.

Sponsored Ad

Perezida Trump azava ku butegetsi ku wa 20 z’uku kwezi kwa mbere nyuma yo gutsindwa mu matora yo mu kwa cumi na rimwe n’umu Democrat Joe Biden.

Ejo ku wa gatatu, Abadepite bagizwe cyane nabo mu ishyaka ry’abaharanira Demokarasi (Democrats) yatoye nyuma y’impaka zamaze amasaha atari make mu gihe ingabo z’igihugu zari zarikanuye hanze n’imbere mu ngoro ya Capitol.

Ikigo gishinzwe iperereza FBI cyamaze gutangaza ko hashobora kuba imyigaragambyo irimo n’intwaro ku murwa mukuru Washington DC n’imirwa mikuru ya za leta zose 50 ya Amerika imbere y’uko Biden arahira mu cyumweru gitaha.

Mu mashusho yasohowe nyuma y’aya matora y’umutwe w’Abadepite, Perezida Trump yasabye abarwanashyaka be kuguma batekanye, ariko ntiyavuze kuri iri yeguzwa rye.

Mu ijwi ryoroheje,Trump yavuze ati: "Imyigaragambyo no kwangiza nta mwanya bifite mu gihugu cyacu... Nta murwanashyaka wanjye wakongera gushyigikira imyigaragambyo".

Trump yashinjwe iki?

Trump yashinjwe n’Abadepite ko yahamagariye abarwanashyaka be kugaba igitero ku ngoro ya Capitol mu ijambo yavuze ku wa 06 z’ukwa mbere, igihe abari mu myigaragambyo bari bakoraniye imbere y’ibiro by’umukuru w’igihugu, Maison Blanche/White House.

Yasabye abarwanshyaka be kugaragaza akababaro kabo "mu mahoro no gukunda igihugu", no "kurwanya n’infuvu zabo zose" ibyo yita ubujura bwabaye mu matora.

Nyuma y’ijambo rya Trump, abarwanashyaka be bahise bajya kuri Capitol, binjira ku ngufu, batuma abadepite n’abasenateri bahagarika igikorwa cyo kwemeza ibyavuye mu matora bajya kwihisha.

Iyo nyubako yahise ifungwa kubera ko abashinzwe umutekano bari bahanganye n’abigaragambya, abantu batanu bakaba ari bo bahasize ubuzima.

Mu cyumweru gishize, aba Repubulika 139 nibo bemeje ko ibyavuye mu matora yo mu 2020 byateshwa agaciro.

Muri izo mpaka havuzwe ibiki?

Abadepite bamwe bashyigikiye ibyo kweguza Trump,abandi nabo baramushyigikira.

Umukuru w’inteko ishingamategeko,umutwe w’Abadepite Nancy Pelosi w’umu Democrate, yagize ati: "Umukuru wa leta Zunze Ubumwe za Amerika yateje akaga, n’intambara ku gihugu cyacu dusangiye.

Agomba kugenda. Ni akaga ku gihugu cyacu dukunda".

Umudepite w’umu Democrate witwa Julian Castro yavuze ko Trump ari we "muntu mubi cyane wahawe inshingano zo kurongora igihugu mu mateka y’igihugu".