Umuvugizi w’ishyaka CNL avuga ko ejo kuwa gatatu mu ntara zose z’u Burundi hafunzwe abantu bo muri iri shyaka barenga 200 abandi bagacirwa imanza uwo munsi mu gihe abona nta birego bifatika bibariho.

Sponsored Ad

Terence Manirambona uvugira iri shyaka, avuga ko n’uyu munsi kuwa kane hari abandi bafashwe muri urwo rukurikirane rushingiye ku matora yabaye ejo kuwa gatatu tariki ya 20 Gicurasi 2020.

Umuvugizi w’igipolisi cy’u Burundi ejo yabwiye ihuriro ry’ibitangazamakuru mu gutangaza amatora ko umunsi w’amatora wabaye mu mahoro hose mu gihugu.

Igipolisi ntacyo kiratangaza ku bivugwa n’ishyaka CNL.

Bwana Manirambona yabwiye BBC ko benshi mu bafunzwe ejo ari abari bagiye guhagararira CNL ku tuzu tw’amatora.

Ati: "Abo byaraboneka ko hari uruhigi rwabo kuko bafataga nk’umuntu ngo wowe uje ukererewe, bagata muri kasho.

"Ahandi bashatse abakuru ba CNL muri komine cyangwa ku mitumba bagata muri kasho ngo ariho aratoba amatora nta muntu numwe uri kugira icyo amurega".

Bwana Manirambona avuga ko hari abahise bacirwa imanza z’ako kanya, akavuga ko izo manza bazicaga uko babonye.

Imbuga nkoranyambaga zagarutseho

Mbere y’amatora, minisiteri ishinzwe umutekano yategetse ko nyuma y’amatora nta bantu bagomba kuguma ku biro by’amatora, nk’uko hari abakuriye amashyaka bari babisabye abarwanashyaka bayo.

Bwana Manirambona avuga ko abafunzwe uyu munsi atari benshi, ko ari abari bagiye kureba uko kubara amatora bikorwa kuri za komine nk’uko babyemererwa n’amategeko.

Ku mugoroba wo kuri uyu wa kane kandi mu Burundi imbuga nkoranyambaga zongeye gusubiraho ku bantu bose bazikoresha.

Inkuru ya BBC