skol
startimes

Ibyari byanditse mu ibaruwa irimo uburozi yohererejwe Trump byamenyekanye

Amakuru   Yanditswe na: Dusingizimana Remy 23 September 2020 Yasuwe: 1353

Umugore wo muri Canada yarezwe n’urukiko rwa leta ya Amerika koherereza Perezida Donald Trump ibaruwa irimo uburozi bwa ricin.


Pascale Ferrier w’i Québec, yatawe muri yombi ku cyumweru ari kwinjira muri leta ya New York ku mupaka w’ahitwa Buffalo. Abategetsi bavuga ko yari yitwaje imbunda.

Pacale yavuze ko atemera icyaha aregwa cyo gushaka guhungabanya perezida.

Iyo baruwa bivugwa ko yoherejwe mu cyumweru gishize, havumbuwe ubukana bwayo itaragera muri White House.

Muri iyo baruwa, uwayanditse asaba Bwana Trump guhagarika kwiyamamaza, ariko harimo na ricin, uburozi karemano buba mu ntete z’ikimera cyo mu bwoko bw’ibibonobono.

Muri iyo baruwa kuri Bwana Trump yari yanditsemo ati: "Nakuboneye izina rishya: ’Umunyagitugu usa nabi’". FBI ivuga ko kuwa kabiri ari bwo uregwa yashyikirijwe urukiko i New York.

Iyo baruwa irakomeza iti: "Nizere ko uyikunda. Urasenya Amerika uyijyana mu kaga. Mfite babyara banjye muri Amerika, rero sinshaka indi myaka ine muri kumwe nka perezida. Hagarika kujya mu matora."

Ibaruwa ivuga ubwo burozi nk’"impano idasanzwe" kandi ko "nidakora, nzashaka ubundi buryo nkugezaho uburozi, cyangwa nzakoreshe imbunda yanjye ninshobora kuza."

FBI ivuga ko iyo baruwa iriho ibimenyetso by’intoki (fingerprints) z’uregwa.

Bikekwa ko yohereje ubundi burozi nk’ubu ahantu hatanu muri Texas, harimo muri gereza no mu biro by’umupolisi mukuru nk’uko bivugwa n’inyandiko z’urukiko.

Madamu Pascale ku wa kabiri nimugoroba mu rukiko rw’i Bufallo, New York, yari kumwe n’umuntu usemura Igifaransa nk’uko ibitangazamakuru byaho bibivuga.

Umunyamategeko we yasabye ko habanza kumenyekana neza niba umwirondoro w’uregwa uhuye n’uw’uwazanywe mu rukiko.

Umucamanza yavuze ko iburanisha rindi rizaba tariki 28 z’uku kwezi kwa cyenda. Uregwa arakomeza gufungwa kugeza icyo gihe kuko abashinjacyaha bavuga ko ashobora gucika arekuwe.

Pascale Ferrier ni inde?

Pascale Cécile Véronique Ferrier, afite imyaka 53, akora ibijyaye na ’computer programming’, ubusanzwe akomoka mu Bufaransa, yahawe ubwenegihugu bwa Canada mu 2015 nk’uko ibitangazamakuru byaho bibivuga.

Mu kwezi kwa gatatu 2019, yafungiwe muri leta ya Texas aregwa kwitwaza imbunda binyuranyije n’amategeko, n’uruhushya ruhimbano rwo gutwara imodoka nk’uko inyandiko zo muri gereza zibivuga.

Yoherejwe muri Canada nyuma y’uko abategetsi babonye ko Visa ye muri Amerika yari yararangiye kandi yahakoze icyaha nk’uko bivugwa n’ikinyamakuru New York Times.

Kugeza ubu bivugwa ko uburozi bundi yohereje muri leta ya Texas nta muntu bwagize icyo butwara kuko bwavumbuwe mbere.

Ku wa mbere abapolisi muri Québec basatse inzu ye iri ahitwa Saint-Hubert bavuga ko ibirimo bihuye n’uregwa.

Ubwo yafatirwaga ku mupaka yinjira muri Amerika, yari yitwaje imbunda, amasasu n’icyuma mu modoka ye.

Ricin ni iki?

Ni uburozi bushobora kugera mu mubiri w’umuntu abumize, abuhumetse, cyangwa abutewe mu rushinge, bukamutera isesemi, kuruka, kuvira imbere no kudakora kw’ingingo z’imbere mu mubiri.

Nta muti w’ubu burozi bwa ricin uzwi.

Iyo igeze mu muntu ashobora gupfa mu gihe kiri hagati y’amasaha 36 na 72 bitewe n’ingano yafashe nk’uko bivugwa n’ikigo cya Amerika cyo kwirinda no kurwanya ibyorezo, CDC.

Ubu burozi bushobora gutunganywa mu buryo butandukanye harimo no gukora ifu yabwo itumuka.

Ibiro bya perezida wa Amerika n’ibindi biro bya leta muri Amerika mbere byigeze kohererezwa ubu burozi bwa ricin.

Mu 2014, umugabo wo muri Mississippi yakatiwe gufungwa imyaka 25 kubera kohereza ibaruwa irimo ricin kuri Perezida Barack Obama n’abandi bategetsi.

Shannon Richardson, umugore uzwi kuri za televiziyo muri Amerika, nawe mu 2014 yakatiwe gufungwa imyaka 18 kubera koherereza ricin Bwana Obama n’uwahoze akuriye umujyi wa New York, Michael Bloomberg.

BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Leta ya Tanzania yajyanwe mu rukiko kubera kubuza kwiga abanyeshuri...

Umuryango Equality Now uharanira uburenganzira bw’abagore, wareze leta ya...
20 November 2020 Yasuwe: 431 0

Uko iburanisha rya mbere rya Kabuga Felicien i La Haye ryagenze

Umwanya munini wafashwe n’umwanditsi w’urukiko asoma ibiregwa Felicien...
11 November 2020 Yasuwe: 2722 0

Felicien Kabuga yaburaniye mu rukiko rw’I La Haye ku nshuro ya...

Ku nshuro ya mbere, Kabuga Félicien ukurikiranweho ibyaha bya jenoside...
11 November 2020 Yasuwe: 1493 0

Umuryango wa Paul Rusesabagina watanze ikirego mu rukiko rw’Africa...

Umuryango wa Paul Rusesabagina uvuga ko abanyamategeko washyizeho ejo ku wa...
28 October 2020 Yasuwe: 1703 0

"Kujya mu Burundi kuburana ninko kwiyahura" –Pierre Buyoya

Pierre Buyoya wahoze ayoboye igihugu cy’U Burundi uherutse gukatirwa...
25 October 2020 Yasuwe: 2632 0

Umucamanza yategetse ko Kabuga Felicien yoherezwa kuburanira i La...

Umucamanza w’urwego rwa ONU/UN rwasigaye rurangiza imanza zasizwe n’urukiko...
21 October 2020 Yasuwe: 1081 0