skol
startimes

Umupolisi wishe George Floyd amushinze ivi yagejejwe imbere y’urukiko asabwa ingwate ihambaye

Amakuru   Yanditswe na: Dusingizimana Remy 9 June 2020 Yasuwe: 4049

Derek Chauvin wahoze ari umupolisi mu mujyi wa Minneapolis uregwa kwica umugabo udafite intwaro George Floyd bwa mbere yagejejwe imbere y’urukiko ejo ku wa mbere, urukiko rwavuze ko ingwate yo kugira ngo arekurwe by’agateganyo ari miliyoni 1,25 y’amadorari.


Abashinjacyaha bavuze ko "ibyo aregwa bikomeye" kandi n’umujinya wa rubanda ari impamvu yo kuba iyo ngwate ye ihera nibura kuri miliyoni imwe y’amadorari.

Bwana Chauvin araregwa ubwicanyi bwo mu cyiciro cya kabiri. Abandi bapolisi batatu bari kimwe nawe nabo bararegwa ubufatanyacyaha no kureberera.

Ubwicanyi kuri George Floyd bwateje imyigaragambyo ahatandukanye ku isi no gusaba impinduka mu rwego rwa polisi muri Amerika.

Hagati aho i Houston muri leta ya Texas aho Bwana Floyd yakuriye mbere yo kwimukira i Minneapolis, ejo basezeyeho umurambo we mu gihe cy’amasaha atandatu aho wari washyizwe mu rusengero rwitwa The Fountain of Praise church.

Uyu munsi biteganyijwe ko aza gushyingurwa n’abagize umuryango we aho muri Houston. Imihango yo kumusezeraho yabaye kandi muri Minneapolisi na North Carolina aho yavukiye.

Joe Biden, umukandida w’ishyaka ry’abademokarate ku mwanya wa perezida, ejo yagiye guhura n’abo mu muryango wa Floyd i Houston ngo abihanganishe.

Byagenze bite mu rukiko?

Bwana Chauvin, wamaze imyaka 19 mu gipolisi, ntabwo yari ari mu cyumba cy’urukiko ahubwo yari muri gereza hakoreshwa ikoranabuhanga ry’amashusho.

Mu iburanisha ryamaze iminota 15 ntacyo yigeze avuga, yari yambitswe amapingu n’umwambaro w’ibara rya ’orange’ yicaye imbere y’ameza matoya.

Umucamanza Jeannice M Reding yavuze ko ingwate yo kugira ngo arekurwe by’agateganyo ayishyize kuri miliyoni 1,25 y’amadorari.

Umunyamategeko umwunganira ntabwo yaburanye kuri icyo giciro.

Bwana Chauvin w’imyaka 44 ubu afungiye muri gereza ya Minnesota yitwa Oak Park Heights, nyuma yo kwimurwa inshuro nyinshi.

Azongera gusubira mu rukiko tariki 29 y’uku kwezi kwa gatandatu.

Ni ibihe byaha aregwa?

Aregwa ibyaha bitatu: ubwicanyi butagambiriwe bw’icyiciro cya kabiri, ubwicanyi bw’icyiciro cya gatatu n’ubuhotozi bw’icyiciro cya kabiri, igihano cyabyo gishobora kugera ku myaka 40, 25 na 10 y’igifungo uko bikurikiranye.

Hari ibindi birego bishobora kuzanwa ariko biboneka ko ashobora kutazaregwa ubwicanyi bwo mu cyiciro cya mbere kuko abamushinja byasaba ko berekana ko yari yabanje gucura uwo mugambi, kuwugerageza n’impamvu nkuko bivugwa n’ibiro ntaramakuru Associated Press.

Inama y’ubutegetsi y’umujyi wa Minneapolis yatoye itegeka guca uburyo polisi yari yemerewe bwo gufata ukekwa agatabwa ku munigo no kumushinga ivi ku ijosi, banasabye ko habaho gusesa igipolisi.

Mu Bufaransa, ahabaye imyigaragambyo ya ’Black Lives Matter’ (ni ukuvuga ngo ubuzima bw’abirabura bufite agaciro) mu mpera y’icyumweru gishize, Minisitiri w’ubutegetsi bw’igihugu Christophe Castaner yatangaje ko polisi itazongera gufata abantu mu ijosi.

Abaharanira uburenganzira bwa muntu mu Bufaransa bavuga ko mu mwaka ushize gusa hari ibirego 1,500 byatanzwe birega abapolisi ubugizi bwa nabi.

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Nigeria: Inteko ishinga amategeko yemeje itegeko ryo gushahura abagabo...

Inteko ishingamategeko yo muri leta ya Kaduna mu majyaruguru ashyira...
11 September 2020 Yasuwe: 779 0

Charles Ndereyehe uregwa jenoside wari wafunzwe na polisi y’Ubuholandi...

Charles Ndereyehe, Umunyarwanda utuye mu Buholandi ukekwaho kugira uruhare...
9 September 2020 Yasuwe: 1567 0

Abanyamategeko bashyizweho n’umuryango wa Rusesabagina ngo bamwunganire...

Babiri mu banyamategeko bashyizweho n’umuryango wa Paul Rusesabagina ngo...
8 September 2020 Yasuwe: 4555 1

USA: Abapolisi 7 bahagaritswe ku kazi bazira urupfu rw’umwirabura witwa...

Abapolisi barindwi ba Amerika bahagaritswe mu kazi nyuma y’urupfu...
4 September 2020 Yasuwe: 628 0

Urukiko rusesa imanza rwavuze igihe ruzafata umwanzuro kuri Kabuga...

Urukiko rusesa imanza mu Bufaransa rwavuze ko tariki 30 z’uku kwezi cya...
2 September 2020 Yasuwe: 682 0

umuhungu wa Paul Rusesabagina yarahiriye gukora ibishoboka byose akisubiza...

Nyuma y’aho RIB yerekanye ko yataye muri yombi Paul Rusesabagina kuri uyu wa...
2 September 2020 Yasuwe: 9761 2