Mu gihugu cy’u Burundi,hagaragaye abarwayi ba mbere babiri ba Coronavirus barimo umwe w’imyaka 56 n’undi w’imyaka 42 ariko ngo bose baturutse hanze y’iki gihugu.

Sponsored Ad

Minisiteri y’ubuzima ishinzwe no kurwanya SIDA yatangaje ko iki cyorezo cyamaze kugera muri iki gihugu ndetse ku ikubitiro hagaragaye abantu babiri.

Mu kiganiro Minisitiri w’Ubuzima no kurwanya SIDA amaze guha abanyamakuru kuri uyu mugoroba wo ku wa kabiri tariki ya 31 Werurwe 2020, yavuze ko abanduye ari abagabo 2 b’imyaka 56 na 42, binjiye bava muri Dubai umwe muri bo akaba yaraciye mu Rwanda, bose bakaba ari Abarundi.Ubu bari kuvurirwa mu bitaro bya Bumerec biri mu mujyi Bujumbura, aho bari basanzwe barashyizwe mu kato.

Uyu minisitiri yasabye Abarundi gukomeza kubahiriza ingamba zerekeye isuku hamwe no kwirinda gukoranaho kugira ngo birinde kwanduzanya iyi virusi kandi ntikwirakwire.

Iri tangazo rije nyuma y’aho Umuryango uharanira uburenganzira bwa muntu Human Rights Watch uvuga ko mu gihe iki gihugu kidatanga amakuru nyayo kuri Covid-19, abategetsi bari gushyira mu kaga gakomeye ubuzima bw’abantu benshi.

Hashize iminsi mike ibitaro bya Kira I Bujumbura bitangaje ko hari abantu 3 bafite ibimenyetso bigaragarira buri wese bya Coronavirus ariko Leta ihita ibihakana.

U Burundi bwari mu bihugu bike cyane bya Afrika bitari byakagezemo COVID 19.