Impanga eshatu zavutse muri Mexique (Mexico) bazisanzemo coronavirus "mu buryo butari byarigeze bubaho mbere", nkuko abakuriye ibikorwa by’ubuvuzi aho babivuze.

Sponsored Ad

Impuguke mu buvuzi ziri kugenzura niba iyi ndwara barayanduriye mu ngobyi (placenta) y’umubyeyi wabo ubwo yari akibatwite.

Babiri muri abo bana, umuhungu umwe n’umukobwa umwe, bari kugenda boroherwa mu bitaro byo muri leta ya San Luis Potosí - imwe mu zigize iki gihugu.

Ariko umuhungu wa kabiri we ari kuvurwa indwara yo mu myanya y’ubuhumekero.

Umuvugizi w’urwego rw’ubuvuzi muri iyo leta yavuze ko ubwandu bw’abana bavutse ari impanga nta handi hazwi ku isi bwari bwarigeze bugaragara, ko rero bari kugenzura ngo hamenyekane icyabiteye.

Umubare muto cyane w’abana bavuka bagiye bandura coronavirus nyuma yo kuvuka, ariko abakuru b’urwego rw’ubuvuzi bavuga ko batibaza ko ari ko byagenze no kuri izi mpanga eshatu.

Mónica Liliana Rangel Martínez, umunyamabanga ushinzwe ubuzima muri iyo leta ya San Luis Potosí, yagize ati:

"Byaba ari ibintu bidashoboka ko banduye ubwo barimo kuvuka".

Ariko, ababyeyi b’abo bana b’impanga ubu bari gupimwa coronavirus, abakuriye urwego rw’ubuvuzi bakavuga ko bashobora kuba bari bamaze igihe baranduye ariko nta bimenyetso bagaragaza.

Kuva umuntu wa mbere wanduye coronavirus yagaragara muri Mexique ku itariki ya 28 y’ukwezi kwa kabiri uyu mwaka, harabarurwa abayanduye barenga 191,000.

Muri abo abarenga 23,000 imaze kubica naho abarenga 143,000 bamaze kuyikira, nkuko imibare ya Kaminuza ya Johns Hopkins yo muri Amerika ibigaragaza.

BBC