skol
Kigali
startimes

Inkangu yarengeye ikigo cya gisirikare muri Vietnam benshi bahasiga ubuzima

Amakuru   Yanditswe na: Dusingizimana Remy 19 October 2020 Yasuwe: 1500

Muri Vietnam harimo gushakishwa abasirikare 11 bari mu bari mu kigo cyabo kikarengerwa n’inkangu.


Iki gihugu cyugarijwe n’imyuzure, ya mbere ikaze cyane ibayeho mu myaka myinshi ishize.

Kugeza ubu imirambo 11 ni yo imaze kuvanwa muri cyo kigo cya gisirikare, ubu cyahindutse itongo, mu ntara ya Quang Tri iri rwagati muri Vietnam.

Umutegetsi umwe yavuze ko nijoro yumvise inkangu "ziturika nk’ibisasu".

Imvura nyinshi yibasiye ibice byinshi bya Vietnam muri iki cyumweru gishize. Imyuzure n’inkangu bimaze kwica abantu batari munsi ya 70.

Hari ubwoba ko mu minsi iri imbere amazi y’imyuzure ashobora kwiyongera.

Leta ya Vietnam yavuze ko umutwe w’abasirikare wo mu karere ka kane k’ingabo z’iki gihugu, wibasiwe n’inkangu mu masaha yo mu rukerera rwo kuri iki cyumweru.

Urubuga rw’amakuru VnExpress rwo muri Vietnam rwasubiyemo amagambo ya Ha Ngoc Duong, umutegetsi w’aho byabereye, agira ati:

"Guhera saa munani [2h] za nijoro, habayeho inkangu nk’enye cyangwa eshanu, ziturika nk’ibisasu ndetse wumva ari nkaho umusozi wose ugiye gutembagara".

Mu gihe abakora mu bikorwa by’ubutabazi bari barimo gukuramo imirambo, abategetsi baburiye ko hari ibyago ko habaho izindi nkangu, bikaba byaba ngombwa ko hashakishwa ubundi buryo burimo umutekano kurushaho bwo kugera aho byabereye.

Iyi nkangu yahitanye ubuzima bw’abantu, ibaye hashize iminsi itsinda ry’abantu 13 bakoraga ibikorwa by’ubutabazi - benshi muri bo b’abasirikare - basanzwe bapfuye.

Abo bari barimo kugerageza kurokora abakozi babakura mu rugomero rw’amashanyarazi (cyangwa umuyagankuba mu Kirundi), rwari rwangijwe n’inkangu mu ntara ya Thua Thien Hue, ihana imbibi n’iyo ntara yabayemo inkangu kuri iki cyumweru.

BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Umukwe wa Perezida Habyarimana ushinjwa kugira uruhare muri Jenoside...

Ntilivamunda Alphonse, umukwe wa Perezida Juvenal Habyarimana, yapfuye ku...
19 November 2020 Yasuwe: 5461 0

Umudipolomate w’Ubwongereza mu Bushinwa yakoze benshi ku mutima kubera...

Nubwo ari umunyacyubahiro,Bwana Stephen Ellison,uherutse koherezwa...
17 November 2020 Yasuwe: 3812 0

Umusaruro w’urukingo rwa Covid-19 uzatangira kwigaragaza cyane ku mpeshyi...

Umusaruro w’urukingo rwa Covid-19 uzatangira kwigaragaza cyane ku mpeshyi...
17 November 2020 Yasuwe: 494 0

Kenya: Covid-19 yishe abaganga 10 mu minsi 4, none bagiye kwigaragambya

Ihuriro ry’abaganga muri Kenya ryaburiye leta ko mu minsi 21 rizakora...
16 November 2020 Yasuwe: 562 0

Jerry Rawlings wayoboye Ghana yatabarutse azize uburwayi

Jerry John Rawlings wahoze ari perezida wa Ghana yatabarutse afite imyaka...
12 November 2020 Yasuwe: 858 0

Amadou Toumani Touré wabaye perezida wa Mali imyaka 10 yapfuye

Amadou Toumani Touré wahoze ari perezida wa Mali uyu munsi yatabarutse ku...
10 November 2020 Yasuwe: 1898 0