skol
Kigali
startimes

Kugeza urukingo rwa Coronavirus ahatandukanye ku isi ’bizasaba indege 8000 nini cyane’

Amakuru   Yanditswe na: Dusingizimana Remy 10 September 2020 Yasuwe: 1962

Urwego rw’ubwikorezi bwo mu ndege ruvuga ko kugeza urukingo rwa coronavirus mu bice bitandukanye byo ku isi bizaba ari "ubwikorezi bwa mbere bugoranye cyane bubayeho".


Ishyirahamwe mpuzamahanga rw’ubwikorezi mu ndege (IATA) ryavuze ko bizasaba ibingana n’indege 8000 zo mu bwoko bwa Boeing 747.

Nta rukingo rwa Covid-19 ruraboneka kugeza ubu, ariko IATA yamaze gutangira gukorana na kompanyi z’indege, ibibuga by’indege, inzego z’ubuzima zo ku isi n’inganda zikora imiti ku buryo urwo rukingo rwazagezwa mu bice bitandukanye byo ku isi.

Izo ndege zicyenewe, ni mu gihe bifatwa ko buri muntu wo ku isi yacyenera doze (dose) imwe gusa y’urukingo.

Alexandre de Juniac, umuyobozi mukuru wa IATA, yagize ati:

"Gutwara inkingo za Covid-19 mu mutekano bizaba ari bwo butumwa buranze iki kinyejana mu rwego rw’ubwikorezi mu ndege. Ariko ibyo ntibizaba hatabayeho kubitegurana ubushishozi hakiri kare. Kandi igihe cyo kubikora ni iki".

Mu gihe kompanyi z’indege zimaze igihe zibanda ku gutwara imizigo, muri iki gihe gutwara abantu byajemo ingorane kubera kwirinda coronavirus, gutwara inkingo mu ndege byo ni urusobe kurushaho.

Ntabwo ari indege zose zifite ubushobozi bwo gutwara inkingo kuko gutwarwa imiti bicyenera ahantu hafite igipimo cy’ubushyuhe buri hagati ya dogere 2C na 8C.

Gutwara inkingo zimwe bishobora gusaba ubukonje bwa dogere 0C, ibyo bikaba byatuma hari indege nyinshi zidafite ubushobozi bwo kuzitwara.

Glyn Hughes, ukuriye ubwikorezi bw’imizigo mu ishyirahamwe IATA, yongeyeho ati:

"Tuzi neza uburyo bikorwamo. Icyo ducyeneye gukora ubu ni ukongera ubushobozi bukagera ku rwego ruzaba rucyenewe".

Yavuze ko ingendo z’indege mu bice bimwe byo ku isi, birimo nka bimwe byo muri Aziya y’amajyepfo ashyira uburasirazuba, zizaba ari ingenzi kuko aho hantu nta bushobozi bwo gukora inkingo buhari.

Kurugeza muri Afurika bizasaba iki?

Ishyirahamwe IATA rivuga ko kugeza muri Afurika urukingo rwa Covid-19 - rubaye rubonetse - muri iki gihe "bitashoboka" kubera ko nta bushobozi buhari bwo gutwara imizigo, ingano y’akarere k’Afurika n’urusobe rw’ibibazo byo kwambuka imipaka.

IATA ivuga ko ubu bwikorezi buzasaba "gukorwa neza bijya gusa nk’igikorwa cya gisirikare", ndetse bisabe ko habaho ahantu hahehereye hazabikwa izo nkingo.

Inkingo zigera hafi ku 140 ku isi ziri mu cyiciro cy’ibanze cyo gukorwa, naho izibarirwa muri za mirongo ubu zirimo kugeragerezwa ku bantu.

Muri izo ziri kugeragerezwa ku bantu harimo n’urwa Kaminuza ya Oxford yo mu Bwongereza rumaze kugera mu cyiciro cya nyuma cy’igeragezwa.

Ishyirahamwe IATA ryasabye za leta z’ibihugu gutangira ubu gutegurana ubushishozi kugira ngo zitegure neza igihe inkingo zizaba zimaze kwemezwa zinatangiye gukwirakwizwa ku isi.

Usibye gutegura uburyo zitabwaho kandi zigatwarwa mu bipimo by’ubushyuhe bya ngombwa, umutekano nawo ni ikindi kibazo.

IATA yongeyeho iti: "Inkingo zizaba ari ibicuruzwa bifite agaciro gakomeye cyane. Hagomba gutegurwa uburyo imizigo yazo ibikwa mu mutekano ntivogerwe kandi ntiyibwe".

BBC

Author : Dusingizimana Remy

Dusingizimana Remy is a journalist for Umuryango.rw. He studied at the University of Rwanda.He holds a Bachelor’s degree in Journalism and Communication. He started his career in writing about sports in 2015.Follow him on Twitter and Instagram @REMY SAGAN

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Ibaruwa irimo uburozi bwa ’ricin’ yari igiye guhabwa Trump muri White...

Ubutumwa burimo uburozi bwa ’ricin’ bwari bwohererejwe Perezida Donald Trump...
20 September 2020 Yasuwe: 2130 0

Indonesia: Abafashwe banze banze kwambara agapfukamunwa bari gutegekwa...

Mu cyaro kimwe cyo mu gihugu cya Indonesia,abaturage bari gufatwa batambaye...
18 September 2020 Yasuwe: 724 0

Tanzania: Abana 10 bapfiriye mu muriro wafashe inzu bararaGAmo ku ishuri...

Abana 10 bapfiriye mu muriro watwitse inzu bararamo mu gicuku cy’uyu munsi...
14 September 2020 Yasuwe: 701 0

RDC: Ibirombe byagwiriye abantu 50 bose bahita bahasiga ubuzima

Ibirombe 3 byacukurwagamo Zahabu mu gace kitwa Kamituga muri RDC byagwiriye...
12 September 2020 Yasuwe: 824 0

Kugeza urukingo rwa Coronavirus ahatandukanye ku isi ’bizasaba indege 8000...

Urwego rw’ubwikorezi bwo mu ndege ruvuga ko kugeza urukingo rwa coronavirus...
10 September 2020 Yasuwe: 1962 0

Australia: Umugabo warimo aserebeka ku nyanja yishwe n’igifi cya...

Umugabo wo muri Australia yishwe n’ifi yo mu bwoko bwa Shark ku mwaro...
9 September 2020 Yasuwe: 1346 0