skol
fortebet

Musenyeri Gérald Mulumba wari ukuriye urugo rwa perezida Tshisekedi yishwe na Coronavirus

Yanditswe: Wednesday 15, Apr 2020

Sponsored Ad

Amakuru aturuka muri RDC kuri uyu wa 15 Mata 2020,aravuga ko Musenyeri Gérald Mulumba uvuka na se wa Perezida Félix Tshisekedi yitabye Imana azize uburwayi bwa Coronavirus.

Sponsored Ad

Musenyeri Gérald Mulumba wari ufite imyaka 83, niwe wari ukuriye gahunda z’urugo rw’Umukuru w’igihugu (chef de la maison civile du chef de l’Etat) Umwanya ungana na Minisitiri muri iki gihugu.

Umwe mu bagize Guverinoma muri RDC, yabwiye ikinyamakuru Actualite.cd ko ‘Mgr Mulumba, yavurirwaga mu rugo, umurambo we ukaba wajyanywe mu buruhukiro’.

Yavuze kandi ko Perezida Tshisekedi yashenguwe n’uru rupfu kuko Mgr Mulumba yari Se wabo.

Mgr Gérard Mulumba Kalemba yavutse mu mwaka wa 1937.Yagizwe padiri ku myaka 30 hanyuma aza kugirwa musenyeri wa Mweka, muri Kasaï,mu mwaka 1989.

Ayoboye iyo diyosezi yakoze byinshi birimo kubaka aamshuri menshi na za paruwasi nyinshi cyane.

Ku myaka 75 yashatse kujya mu kiruhuko cy’izabukuru gusa Papa Francis yabimwemereye mu mwaka wa 2017.

Kuva muri Repubulika Iharanira Demokarasi ya Congo hagaragara icyorezo cya Coronavirus, kuwa 10 Werurwe 2020, abagera kuri 254 bamaze kuyandura, abagera kuri 21 imaze kubica naho 21 bamaze gukira.

Kuwa 20 Werurwe 2020,nibwo Perezida wa DR Congo,Felix Tshisekedi, yatangaje ingamba nshya zo kurwanya ikwirakwira rya Covid-19 muri iki gihugu yamaze kugeramo.

Nyuma y’aho icyorezo cya COVID-19 gitangiye gukwirakwira muri Afurika ndetse kuri ubu kikaba kimaze kugera mu bihugu hafi ya byose muri Afurika,Perezida Tshisekedi yafashe ingamba zo kurinda ko gikwirakwira mu gihugu cye.

Ingamba zafashwe na perezida Tshisekedi zirimo:

Guhagarika ingendo zose ziva mu bihugu birimo iyi ndwara ziza muri DR Congo

Abantu barenze 20 ntibemerewe guhurira ahantu rusange, uretse mu ngo zabo

Gufunga amashuri yose mu gihugu mu gihe cy’ibyumweru bine,uhereye kuwa kane taliki ya 19 Werurwe 2020

Gufunga ibikorwa byose by’amakoraniro y’abasenga mu byumweru bine

Guhagarika ibikorwa bya siporo mu masitade n’ibindi bikorwa bya siporo rusange

Gufunga inzu z’imyidagaduro (disco), utubare, café na restaurants

Kubuza amakoraniro y’abashyingura, ko umurambo uzajya uvanwa mu buruhukiro ujyanwa ku irimbi uherekejwe n’abantu bacye.

Perezida Tshisekedi yavuze ko igihe cyo gushyira mu bikorwa ibi byemezo gishobora guhinduka bitewe n’uko iki cyorezo kifashe.

Mu minsi 10 ishize abari baranduye iki cyorezo muri Afurika bari 8,018 abo yari imaze kwica bari 339, imibare yombi yikubye kabiri muri rusange ugereranyije n’ubu.

Kugeza mu ijoro ry’ejo kuwa kabiri, abantu 15,738 nibo bari bamaze kumenyekana ko banduye iyi virus, muri bo 838 yarabishe naho 2,920 barayikize.

Iyi imibare itangazwa n’urwego rushinzwe kurwanya ibiza rw’Umuryango w’Ubumwe bwa Afurika.

Imibare y’abakira iyi ndwara igenda yiyongera cyane ku isi no muri Afurika.

Mu minsi 13 ishize abayikize ku isi bari 210,000 ubu bamaze kugera ku 484,000 nk’uko bivugwa na kaminuza ya Johns Hopkins.

Iyi mibare yikubye kabiri no muri Afurika kuko mu minsi 10 ishize bari 652 ubu bakaba bageze kuri 2,920 bayikize nk’uko bivugwa na ruriya rwego rw’Ubumwe bwa Africa.

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa