Mu gitondo cyo kuri uyu wa 11 Kanama 2020, Perezida w’u Burusiya, Vladimir Putin, yatangaje ko abashakashatsi b’iwabo bavumbuye urukingo rwa Covid-19, ndetse ko barugeragereje no ku mukobwa we, bigaragara ko rukora.

Sponsored Ad

Igitangazamakuru The Bloomberg dukesha iyi nkuru, ivuga koi bi bikubiye mu butumwa Perezida Putin yanyujije kuri televiziyo y’igihugu mu gitondo. Perezida Putin yagize ati:

Muri iki gitondo, urukingo rwa mbere rwa Coronavirus rwabonetse. Umwe mu bakobwa banjye yakingiwe, byumvikane ko yagize uruhare muri iri suzuma.

Uvugwa ko yakingiwe akaba ari umwe mu bakobwa babiri ba Putin, Maria na Katerina Putin. Ubwo ngo yari afite ubushyuye bwa 38° amaze gukingirwa busubira ku busanzwe (muri 37°).

Uru rukingo rwakozwe n’ikigo cya Gamaleya Institute giherereye mu murwa wa Moscow, ku bufatanye na Direct Investment Fund byose byo mu Burusiya.

Mu cyumweru gishize, uru rukingo rwakorewe igerageza ku nshuro ya gatatu, ryagiye ritanga icyizere. Biteganyijwe ko mu gihe cya vuba, rutangira guhabwa abakozi bo mu nzego z’ubuzima bari kwita ku barwayi ba Covid-19, abarimu n’abandi bafite ibyago byo kwandura nk’uko byemejwe na Minisitiri w’Intebe wungirije w’u Burusiya, Tatyana Golikova.

Guverinoma y’u Burusiya itangaje uru rukingo mbere y’ibindi bihugu byinshi ku Isi bisa n’ibiri mu irushanwa ryo kurushaka, hamwe n’umuti uvura icyorezo cya Covid-19. Ni mu gihe kandi Madagascar yabimburiye ibi bihugu byose mu gutangaza ko yabonye uru rukingo muri Mata 2020, gusa rwarakemanzwe bitewe n’umusaruro rudatanga.

Abahanga bavuga ko urukingo rw’u Burusiya ruteye impungenge kuko ngo Perezida ashobora kuba yihutiye kurutangaza, rutaragaragaza neza ko koko rwavura umubare munini w’abanduye Covid-19.

U Burusiya kandi butangaje uru rukingo, mu gihe Guverinoma y’u Bwongereza iherutse gutangaza ko hari itsinda kabuhariwe ry’abajura bakorera kuri inerineti (hackers) riri kugerageza kwiba amakuru y’urukingo abashakashatsi babwo bari gushakisha. Abazi iby’iri tsinda ry’abajura, bavuga ko rikorana bya hafi n’u Burusiya, kuko ngo ni ryo ryinjiye mu matora ya USA yabaye mu 2016.

Kugeza ubu, abantu barenga miliyoni 20.2 bamaze kwandura Covid-19 ku Isi yose, abarenga 739,700 bamaze gupfa. U Burusiya ni igihugu cya kane kimaze kugira ubwandu bwinshi, ubu abanduriyeyo barenga 897,500 nk’uko bigaragara muri raporo ya World Ometers.