Perezida Andry Rajoelina wa Madagascar yamuritse umuti ukozwe mu byatsi byo kuri icyo kirwa we yemeza ko urinda kandi ukavura ubu bwoko bushya bwa coronavirus nk’uko bivugwa na AFP.

Sponsored Ad

Inzego zishinzwe ubuzima ku isi no muri Afurika ntacyo ziratanga kuri uyu muti watangajwe na Bwana Rajoelina.

Ishami ry’umuryango w’abibumbye ryita ku buzima, OMS, kugeza ubu nta muti riratangaza wakorewe ubushakashatsi uvura Covid-19.

Ku kigo Malagasy Institute of Applied Research (IMRA) cyakoze uwo muti unyobwa, imbere y’abaminisitiri, abadipolomate n’abanayamakuru Rajoelina yagize ati:
"Twakoze isuzuma - abantu babiri ubu bakijijwe n’uyu muti.

"Iki ni icyayi cy’ibyatsi kivura mu minsi irindwi".

Mu kuwushimangira yagize ati: "Ninjye wa mbere uri buwunywe uyu munsi imbere yanyu, mubone ko ukiza kandi utica".

Uyu muti wiswe Covid-Organics, ukozwe mu byatsi byitwa Artemisia - umuti byemejwe ko bikoreshwa mu kuvura Malaria - hamwe n’ibintu byatsi gakondo nk’uko ikigo IMRA kibivuga.

Ubuziranenge bwawo no kuba uvura Covid-19 koko ntabwo biragenzurwa ku rwego mpuzamahanga, nta mibare kandi itangwa n’ubushakashatsi bw’uko wageragejwe.

Abahanga muri siyansi bakomeje kuburira abantu ingaruka mbi bashobora guterwa no gukoresha imiti inyobwa itarapimwe ikozwe mu byatsi .

Bwana Rajoelina ibyo abishyira ku ruhande, avuga ko uwo muti uzahabwa abana b’abanyeshuri mu gihugu kuko ari "inshingano ye kurengera abaturage ba Madagascar".

Kugeza ubu kuri iki kirwa hamaze kuboneka abantu 121 banduye coronavirus, ntawe irahitana muri iki gihugu.

Ishami ry’umuryango w’abibumbye ryita ku buzima, OMS, ryakomeje kuburira abantu kwirinda abantu bemeza ko babonye umuti wa Covid-19, ntabwo ryari mu gikorwa cyo kwerekana uwo muti nk’uko AFP ibivuga.

Abamaze kwandura ku Isi nabo bakomeje kwiyongera mu buryo budasanzwe kuko mu munsi umwe biyongereyeho ibihumbi bigera kuri 40 bagera kuri 2 482 563, bavuye ku 2 407 600 kuwa Mbere.

Leta Zunze Ubumwe za Amerika zikomeje kugira umubare w’abandura n’abapfa benshi, kuko ubu abamaze kwandura bageze 792 938 mu gihe abitabye Imana bavuye ku 40 565 bariho ku wa Mbere, ubu bakaba bageze ku 42 518, nyuma y’aho mu masaha 24 hapfuye abantu 1939.

Ibihugu bifite abanduye ndetse n’abapfuye benshi, ku mwanya wa mbere haracyari Leta Zunze Ubumwe za Amerika, Espagne iri ku mwanya wa kabiri kuko ifite abantu 200 210 bamaze kwandura naho 20 852 bamaze gupfa, u Butaliyani bufite abanduye 181 228 mu gihe 24 114 bamaze gupfa.

Mu Bufaransa abantu 155 383 bamaze kwandura, abandi 20 265 bamaze gupfa.

U Budage bufite abanduye 147 065 mu gihe 4 862 bapfuye, u Bwongereza bufite abanduye 124 743 ariko abamaze gupfa ni 16 509.

Ku Mugabane wa Afurika, abantu 24 209 ubu bamaze kwandura Coronavirus, abamaze gupfa bageze ku 1 164.

Misiri iri imbere n’abamaze kwandura benshi kuko ari 3 333 mu gihe abamaze gupfa ari 250, ikurikirwa na Afurika y’Epfo ifite abanduye 3 300 abapfuye ho bageze kuri 58.

Algeria niho hamaze gupfa abantu benshi muri Afurika kuko ari 384 mu gihe abamaze kwandura ari 2 718.

Muri Afurika y’Iburasirazuba, Kenya niyo ikomeje kugira abanduye benshi kuko ubu bageze kuri 281 mu gihe abamaze gupfa ari 14 , mu Rwanda hamaze kuboneka abantu banduye 147 ariko abamaze gukira bageze kuri 80, Uganda baracyari 56, muri Tanzania hamaze kuboneka abantu 254 hamaze gupfa 10, mu Burundi habonetse batanu, hamaze gupfa umwe mu gihe muri Sudani y’Epfo ari bane banduye.