Hari icyizere ko umuti wa Remdesivir ushobora kuvura abarwaye Coronavirus biturutse ku isuzuma rito rimaze gukorwa n’abashakashatsi bo muri Kaminuza ya Chicago muri Leta Zunze Ubumwe za Amerika

Sponsored Ad

Ku bantu 125 barwaye Coronavirus bakoreweho igerageza n’abo bashakashatsi, bose bakaba baravuwe hakoreshejwe Remdesivir, nubwo ari umuti utaremezwa muri Leta Zunze Ubumwe za Amerika mu kuvura indwara iyo ariyo yose, muri abo barwayi 125 bakoreweho ubushakashatsi, 113 bari bafite ibimenyetso bikomeye, bisobanuye ko bananirwaga guhumeka.

Kathleen Mullane, umwarimu mu Ishami ry’Ubuvuzi muri iyi kaminuza, yavuze ko benshi muri abo barwayi bahise boroherwa ku buryo bashobora gusezererwa mu bitaro, babiri gusa nibo bapfuye.

Nubwo ari uko bimeze ariko, ntabwo ibi byafashwe nk’umwanzuro wa nyuma ku bushobozi bw’uyu muti, ahubwo iperereza riracyakomeje kugira ngo harebwe imikorere yawo, aba bashakashatsi bakaba batangaza ko gufata umwanzuro wa nyuma kuri uyu muti iki gihe byaba bije imburagihe.

Remdesivir yakozwe na sosiyete ikora iby’imiti yitwa Gilead nk’umwe mu ishobora kuba yavura Ebola, gusa igeragezwa rya mbere ntabwo ryigeze ritanga umusaruro wari witezwe bituma ugenzwa buhoro.

Gusa ubushakashatsi bumaze iminsi bukorwa bugaragaza ko uyu muti ufite ubushobozi bwo guhangana n’agakoko ka Coronavirus ko mu bwoko bwa SARS na MERS kurusha uko wahangana na Ebola.

Ubwo Covid-19 iterwa na Coronavirus yagaragaraga, abashakashatsi batangiye gukoresha uyu muti mu kugerageza kuvura iyi ndwara nshya, ariko kubera ko utemewe mu kuvura indwara iyo ariyo yose, abaganga ntibashobora kuwufata gutyo gusa ngo bawukoreshe mu kuvura umurwayi wa Covid-19.

Icyo bakora ni uko basaba abawukoze ko bawukoresha mu kuvura umuntu urwaye ariko adafite andi mahitamo yo kwitabwaho.