Ministiri w’ubuzima muri Tanzania yatangaje ko habonetse abantu bashya 53 banduye coronavirus mu gihugu, umubare w’abanduye wikubye hafi kabiri ugereranyije n’uko byari byifashe kuwa gatatu, abanduye bose bageze ku 147.

Sponsored Ad

Minisitiri Ummy Mwalimu yatangaje ko abo bantu bose bashya bayisanzemo ari abaturage ba Tanzania.

Iyi ndwara imaze kugera mu tundi duce twa Tanzania tarimo; Kilimanjaro, Mwanza, Lindi na Kagera mu burengerazuba bw’igihugu.

Mu ngamba zo kurwanya ikwirakwira ry’iyi ndwara, Tanzania yafunze amashuri yose, ibuza n’amahuriro manini y’abantu benshi, gusa amasoko, insengero n’ahandi hahurira abantu birakomeje.

Leta ya Tanzania yavuze ko guhagarika ubuzima busanzwe (lockdown) bishobora kugira ingaruka zikomeye ku bantu kurusha coronavirus.

Bamwe mu batavuga rumwe na leta muri Tanzania basabye leta ko yahagarika ubuzima busanzwe nibura mu bice bimwe na bimwe, cyane mu mijyi minini nka Dar es Salaam.

Nubwo umukuru w’igihugu ejo yasabye ko abaturage bafata amasengesho y’iminsi 3 bagasaba Imana kubakiza iki cyorezo,bigaragara ko ibintu bitameze neza muri iki gihugu hakenewe izindi ngamba.

Kuri uyu wa Kane, Perezida Magufuli yongeye gusaba abaturage kwiragiza Imana ngo ibakize icyorezo cya Coronavirus cyugarije Isi.

Mu butumwa yanditse kuri Twitter yagize ati “Bavandimwe Banya-Tanzania, bitewe n’uburwayi bwa Coronavirus, ndasaba ko dufata iminsi itatu uhereye kuri uyu wa 17 kugeza ku wa 19 Mata 2020, dusabe Imana ishobora byose idukize iki cyorezo. Buri wese asenge n’umutima we wose, Imana iratwumva.”

Mu ngamba Tanzania yafashe mu bwirinzi bw’ikwirakwira rya Coronavirus ni uko abantu bose binjira mu gihugu barimo abenegihugu n’abandi baturutse mu bihugu byagaragayemo Coronavirus bashyirwa mu kato k’iminsi 14 kandi bakitunga.

Muri Tanzania, abantu 11 nibo bamaze gukira coronavirus, naho batanu (5) yarabahitanye.

BBC