Amakuru avuga ko Tanzania yavuze ko idafite gahunda yo gutumiza inkingo za Covid-19, ko ahubwo yizeye ubushakashatsi "ku byatsi" byo muri icyo gihugu.

Sponsored Ad

Mu kiganiro n’ikinyamakuru The East African, Gerald Chami, umuvugizi wa minisiteri y’ubuzima, yakomeje avuga ko afite amakenga niba inkingo zitumizwa mu mahanga nta bibazo ziteza ku buzima kandi niba ari ingirakamaro.

Yavuze ko zakozwe mu buryo bwihuse cyane kuburyo zitaba zarageragejwe neza.

Igerageza ry’inkingo za Covid-19 ryubahiriza ibisabwa bikomeye byo ku rwego mpuzamahanga.

Imyitwarire ya Tanzania kuri Covid-19 itandukanye cyane n’iy’ibindi bihugu bituranye nayo, mu gihe cya vuba gishize byongeye kugira ubwiyongere bw’ubwandu bushya.

Mu mpera y’ukwezi kwa kane, Tanzania yahagaritse gutangaza imibare mishya ijyanye na Covid-19, ndetse mu kwezi kwa gatandatu Perezida John Magufuli avuga ko iyo virusi itakirangwa mu gihugu.

Muri Kamena Perezida John Pombe Magufuli wa Tanzania yatangaje ko iki gihugu "kitakirimo coronavirus" kubera amasengesho y’abaturage bacyo.

Mu rusengero mu mujyi wa Dodoma, Perezida Magufuli yabwiye abasenga ati:ati: "Ndashaka gushimira abatanzania b’ukwemera gutandukanye.

"Nizeye, kandi nzi neza ko n’Abatanzania bizeye, ko icyorezo cya corona Imana yakivanyeho".

Anabashimira ko nta dupfukamunwa n’uturindantoki bambaye.

Magufuli wakunze kuvuga ko iki cyorezo cyakabirijwe, yasabye abantu gukomeza kujya guterana mu nsengero n’imisigiti, ababwira ko "amasengesho azatsinda" iyi virus.

Ishami ry’umuryango w’abibumbye rishinzwe ubuzima ku isi (OMS/WHO) ryatangaje impungenge ritewe n’uburyo leta yitwara kuri iki cyorezo.