skol
fortebet

Ethiopia:Igisirikare cyatangiye kubyina intsinzi mu mijyi myinshi muri Tigray

Yanditswe: Saturday 28, Nov 2020

Sponsored Ad

Igisirikare cya Ethiopia kivuga ko cyafashe imijyi myinshi yo mu karere ka Tigray kari mu majyaruguru y’icyo gihugu.

Sponsored Ad

Ingabo za Ethiopia zimaze ibyumweru zirwana n’ingabo z’ishyaka Tigray People’s Liberation Front (TPLF) riri ku butegetsi muri leta ya Tigray.

Liyetona Jenerali Hassan Ibrahim yavuze ko igisirikare cya Ethiopia cyafashe umujyi wa Wikro, uri mu majyaruguru y’umurwa mukuru Mekelle wa Tigray, ndetse gifata n’indi mijyi myinshi.

Kuri uyu wa gatandatu, umukuru wa TPLF yabwiye ibiro ntaramakuru Reuters mu butumwa bwanditse ko Mekelle "irimo guterwaho ibisasu biremereye".

Debretsion Gebremichael yavuze ko ingabo za leta ya Ethiopia zatangiye igitero cyo gushaka kwigarurira uwo mujyi.

Ntacyo leta ya Ethiopia iratangaza ku mugaragaro kuri ibyo umukuru wa TPLF yavuze, ariko ku wa gatanu Ethiopia yari yavuze ko itangiye "icyiciro cya nyuma" cy’igitero cyayo ku karere ka Tigray.

Amakuru avuga ko abantu babarirwa mu magana bishwe naho abandi babarirwa mu bihumbi bata ingo zabo kuva iyi mirwano yatangira.

Biragoye kwemeza amakuru ajyanye n’ibirimo kubera muri iyo mirwano kuko itumanaho ryose rya telefone na internet mu karere ka Tigray ryahagaze.

Mu nama ejo ku wa gatanu n’intumwa z’umuryango w’ubumwe bw’Afurika, Minisitiri w’intebe wa Ethiopia Abiy Ahmed yazibwiye ko abaturage b’abasivile bo muri ako karere bazarindwa.

Ariko, ntacyo yavuze cyuko hashobora kubaho ibiganiro byo gusoza iyo mirwano.

Mbere, Minisitiri w’intebe Abiy yavuze ko igisirikare kizagerageza kutagirira nabi abaturage b’abasivile batuye i Mekelle - umujyi utuwe n’abantu 500,000 - ndetse ashishikariza abawutuye kuguma mu ngo zabo.

Ingabo z’ishyaka TPLF, zigenzura uwo mujyi, zasezeranyije ko zizakomeza kurwana.

Umuryango w’abibumbye (ONU/UN) waburiye ko hashobora kubaho ibyaha byo mu ntambara igisirikare cya Ethiopia nikigaba ibitero kuri Mekelle.

ONU yanatangaje ko itewe impungenge no kuba abakozi batanga imfashanyo badashobora kugera muri ako karere.

Ku wa kane, abategetsi ba Ethiopia bavuze ko "umuhanda wo gutanga imfashanyo" ugenzuwe na leta, uzafungurwa.

Bongeyeho ko "bashishikajwe no gukorana n’amashami ya UN... mu kurinda abaturage b’abasivile ndetse n’abayicyeneye [imfashanyo]".

Abantu barenga 40,000 bamaze guhunga Ethiopia kuva imirwano yatangira.

Ku wa kane, abasirikare ba Ethiopia bagabwe ku mupaka Tigray ihana na Sudan, aho babujije abantu guhunga imirwano bava mu gihugu, nkuko impunzi zibivuga.

Umunyamakuru wa BBC Anne Soy, ari ku mupaka ku ruhande rwa Sudan, yabonye abasirikare ba Ethiopia babarirwa mu icumi. Byatumye umubare w’abahungira muri Sudan ugabanuka.

BBC

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa