skol
fortebet

"Ingabo za Ethiopia zafashe Tigray"-Minisitiri Abiy

Yanditswe: Sunday 29, Nov 2020

Sponsored Ad

Minisitiri w’intebe wa Ethiopia Abiy Ahmed avuga ko ingabo za leta y’iki gihugu ubu "zigenzura" umurwa mukuru wa leta ya Tigray iri mu majyaruguru.

Sponsored Ad

Mbere yaho, ingabo za Ethiopia zinjiye mu murwa mukuru Mekelle ndetse zikaza igitero cyazo ku ngabo z’ishyaka Tigray People’s Liberation Front (TPLF).

Umukuru wa TPLF yabwiye ibiro ntaramakuru Reuters ko izakomeza "kurwanirira uburenganzira bwacu bwo kwitegeka" no "kurwanya aba bateye kugeza ku wa nyuma".

Amakuru avuga ko abantu babarirwa mu magana bishwe naho abandi babarirwa mu bihumbi bata ingo zabo kubera imirwano.

Yatangiye mu ntangiriro y’uku kwezi kwa cumi na kumwe, nyuma yuko Bwana Abiy atangaje igitero kuri TPLF, ishyaka ryo muri iyo leta, arishinja kugaba igitero ku kigo gikuru cya gisirikare cyo mu majyaruguru kiri hafi y’i Mekelle - ibyo TPLF yahakanye.

BBC yashoboye kuvugana by’akanya gato n’umugabo uri i Mekelle wavuze ko abasirikare ba leta ya Ethiopia bari muri uwo mujyi kandi ko yumvise amasasu ya hato na hato mu gitondo cyo kuri iki cyumweru.

Yongeyeho ko mbere abahatuye bamwe bari bahungiye mu nkengero z’umujyi.

Hagati aho, ambasade y’Amerika mu gihugu gituranyi Eritrea, yavuze ko ibiturika bitandatu byumvikanye mu murwa mukuru Asmara ku wa gatandatu nijoro.

Ingabo za TPLF zigeze kurasa ibisasu bya rokete muri Eritrea, ziyishinja gufasha ingabo za leta ya Ethiopia mu mirwano - ibyo Eritrea na Ethiopia byahakanye.

Ntibiramenyekana niba ibyo biturika byumvikanye i Asmara hari aho bihuriye n’imirwano muri Tigray.

Leta ya Ethiopia yavuze iki kuri Tigray?

Mu butumwa bwo kuri Twitter, Bwana Abiy yavuze ko ingabo za leta ya Ethiopia zirimo kugenzura umujyi wa Mekelle kandi ko ibi "bivuze ko iyi ari impera y’icyiciro cya nyuma [cy’igitero cya gisirikare]".

Ati: "Nejejwe no kubasangiza ko twarangije ndetse duhagarika ibikorwa bya gisirikare mu karere ka Tigray".

Bwana Abiy yavuze ko ingabo ze zabohoje abasirikare babarirwa mu bihumbi bari bafashwe na TPLF ndetse ko zigenzura ikibuga cy’indege n’ibiro bikuru by’ubutegetsi muri iyo leta.

Yongeyeho ko icyo gikorwa cya gisirikare cyakozwe "hitabwa mu buryo bwa ngombwa ku baturage [b’abasivile]".

Mu itangazo rye, Bwana Abiy yanavuze ko ingabo za leta ya Ethiopia "zizakomeza akazi kazo ko gufata abagizi ba nabi ba TPLF no kubageza mu nkiko".

Hari habayeho kugira ubwoba ku gishobora kuba ku baturage 500,000 baba mu mujyi wa Mekelle.

Bwana Abiy yagize ati: "Ubu akazi k’ingenzi dufite imbere yacu ni ukongera kubaka ibyashenywe... [no] gucyura abahunze".

Amakuru ajyanye n’imirwano biragoye kuyemeza kuko imirongo yose ya telefone na internet ihuza n’akarere ka Tigray yaciwe.

TPLF yasubije iki?

Mu butumwa bwanditse yoherereje ibiro ntaramakuru Reuters, umukuru wa TPLF Debretsion Gebremichael ntabwo yavuze mu buryo butaziguye ku kuntu ibintu bimeze muri Tigray, ariko avuga ku ngabo za leta ya Ethiopia agira ati:

"Ubunyamaswa bwabo nta kindi bushobora gukora kitari ukutwongerera umuhate wo kurwanya aba bateye kugeza ku wa nyuma".

Yongeyeho ati: "Ibi bijyanye no kurwanirira uburenganzira bwacu bwo kwitegeka".

Ntabwo bizwi aho Bwana Gebremichael aherereye.

Itangazo yari yasohoye mbere, ducyesha ibiro ntaramakuru AFP, ryashishikarije "umuryango mpuzamahanga kwamagana ibitero by’intwaro ziremereye n’iby’indege z’intambara ndetse n’ubwicanyi burimo gukorwa".

Muri iryo tangazo, yanashinje leta ya Eritrea kugira uruhare mu gitero ku mujyi wa Mekelle.

Abasesenguzi bavuga ko TPLF ubu ishobora kuba irimo kwitegura gusubira mu misozi miremire yo muri ako karere igatangira intambara y’ibitero-shuma (guerrilla) irwanya leta ya Ethiopia.

BBC

Leave a Reply

Your email address will not be published. Required fields are marked *

Who are you?

Amategeko n'amabwiriza birkurikizwa