skol
startimes

Perezida Evariste Ndayishimiye yavuze ko u Burundi nta bitero bugabwaho n’abitwaje intwaro

Amakuru   Yanditswe na: Martin Munezero 25 September 2020 Yasuwe: 1445

Perezida Evariste Ndayishimiye w’u Burundi yatangaje ko nta mitwe yitwaje intwaro igaba ibitero ku Burundi, ngo kuko iyo biza kuba ari byo iyo mitwe yakabaye yarafashe ibice bimwe na bimwe bya kiriya gihugu.


Kuri uyu wa gatanu mu kiganiro yagiranye n’Itangazamakuru ndetse n’abaturage batandukanye b’u Burundi cyabereye i Gitega mu murwa mukuru wa politiki, yavuze ku ngingo zitandukanye zirebana n’u Burundi.

Ku ngingo irebana n’umutekano w’u Burundi, Perezida Ndayishimiye yabajijwe icyo atekereza ku bitero bimaze iminsi bigabwa mu Burundi, asubiza ko igihugu cye kitigeze giterwa, ngo kuko iyo kiza kuba cyaratewe abateye bakagombye kuba baragaragaje uduce tw’u Burundi bafashe. Ati:

Iyo uteye igihugu uravuga uti nafashe Komini iyi niyi. None mwari mwumva hari Komini n’imwe bafashe?

Perezida Ndayishimiye yavuze ko abo biyita abarwanyi baza bakica abaturage ari abagizi ba nabi, ngo kuko nta wavuga ko u Burundi buterwa kandi abategetsi babwo n’abashinzwe umutekano batari mu kaga.

Yashimangiye ko u Burundi ari nyabagendwa yitangiraho urugero rwo kuba amaze iminsi azenguruka igihugu yemwe ananyura mu duce bivugwa ko tubamo abitwaje intwaro, ariko bakaba batarigeze bamutangira na rimwe. Yagize ati:

Igitero ku gihugu gitangirira ku bategetsi bakomeye. Nta kibazo mfite, nkorera ingendo mu gihugu hose kandi nyura n’ahantu abitwaje intwaro byavuzwe ko baba. Murazi amasaha naviriye i Kigoma. Ko ntabwo twahuye? Ejo navuye i Bujumbura nijoro nza i Gitega, ko ntababonye kandi bivugwa ko bahaba? Ni gute wavuga ko igihugu giterwa kandi inzego z’umutekano zitari mu kaga?

Perezida Ndayishimiye yavuze ko u Burundi nta gitero na kimwe bwigeze bugabwaho, mu gihe mu bice byo mu ntara ya Rumonge iri mu burengerazuba bwa kiriya gihugu n’iya Kayanza iri mu majyaruguru yacyo hakunze kumvikana ibitero byagiye bihitana abiganjemo inzego zishinzwe umutekano.

Umutwe wa Red-Tabara urwanya ubutegetsi bw’u Burundi ni wo uherutse gutangaza ku mugaragaro ko ari wo ugaba ibyo bitero.

Mu mpamvu Red-Tabara yagaragaje zituma itera u Burundi, harimo kuba kuva u Burundi bwabamo imvururu zishingiye kuri Politiki mu myaka itanu ishize, ababarirwa mu bihumbi 500 barahunze igihugu, nyuma yo gushyirwaho igitutu gikomeye bazira imyigaragambyo bakoze mu mahoro basaba ko habaho iyubahirizwa ry’amasezerano y’amahoro ya Arusha.

Ivuga ko uretse kuba hari abahunze, hari n’abandi barenga 2,000 bishwe, abarenga 1,000 baburirwa irengero, mu gihe ababarirwa mu magana bakorewe iyicarubozo.

Ku bwa Red-Tabara, ngo kuva muri 2015 “Nta munsi udashobora gusanga umuntu wishwe akajugunywa mu muferege w’amazi cyangwa ku muhanda”, ibyo yemeza bikorwa n’abicanyi ba Leta bica abantu baba babaza uburenganzira bwabo.

Hejuru y’imfu no kuburirwa irengero bya hato na hato, ngo ibihumbi by’Abarundikazi basambanyijwe ku ngufu, abenshi mu rubyiruko bashimutwa n’inzego zishinzwe ubutasi, ku buryo ababarirwa mu 8,000 bafunzwe mu buryo budakwiriye ikiremwa muntu.

Ku by’imikoranire y’abategetsi b’u Burundi n’abakoze Jenoside yakorewe Abatutsi, umutwe wa Red-Tabara wagarutseho, aho washinje ubutegetsi bw’u Burundi kuba igikoresho cyifashishwa mu guhungabanya akarere, ngo kuko bizwi ko ishyaka CNDD-FDD riri ku butegetsi mu Burundi rifite imikoranire ya hafi n’abakoze Jenoside yakorewe Abatutsi. Yagize iti:

Loni, Afurika yunze ubumwe na EAC bazi neza ko ibikoresho cy’ibyaha rusange biri mu Burundi. Bazi ko ubutegetsi bwa CNDD-FDD bwahindutse inzira y’ihungabana ry’umutekano w’akarere ndetse ko bukorana n’imitwe ya gisirikare y’abicanyi bo mu Rwanda bagize uruhare muri Jenoside yakorewe Abatutsi mu 1994.

Uwo mutwe uvuga ko icyo ugamije ari ukubera Abarundi akaboko ka gisirikare, mu rwego rwo kubarinda abicanyi, igitugu, ubukoroni n’ivanguramoko, igasaba imiryango mpuzamahanga gutanga ubufasha kugira ngo Abarundi babone amahoro arambye.

Author : Martin Munezero

Munezero Martin ni Umwanditsi w’Ikinyamakuru Umuryango. Yatangiye gukorera iki kinyamakuru muri Nzeli 2014.

Imbuga nkoranyambaga ze:

Instagram:Martin Promoter
Facebook:Munezero Martin
Twitter :Martin Promoter

Ibitecyerezo

  • Who are you?

    Amategeko n'amabwiriza birkurikizwa


Inzindi nkuru

Ethiopia: Abiy Ahmed yahaye ingabo za Tigray amasaha 72 ngo zibe zamanitse...

Minisitiri w’intebe wa Ethiopia yahaye amasaha 72 ingabo za leta ya Tigray...
23 November 2020 Yasuwe: 591 0

Ethiopia yashyizeho impapuro zo gufata abasirikare bakuru bacyekwaho...

Leta ya Ethiopia yashyizeho impapuro zo guta muri yombi abasirikare bakuru...
19 November 2020 Yasuwe: 1198 0

Umucuruzi wa serivisi zo guhererekanya amafaranga yafatanywe 100,000 FRW...

Mu gitondo cyo ku wa Kabiri tariki ya 17 Ugushyingo 2020, Polisi y’u Rwanda...
19 November 2020 Yasuwe: 993 0

Ingabo za Ethiopia ziri kujya mu murwa mukuru wa Tigray

Ethiopia ivuga ko ingabo zayo zigaruriye ahantu hanini mu leta ya Tigray...
18 November 2020 Yasuwe: 2931 0

Ethiopia: Abiy Ahmed yatangaje igitero simusiga ku murwa mukuru wa...

Minisitiri w’intebe wa Ethiopia Abiy Ahmed yavuze ko igihe ntarengwa cyari...
17 November 2020 Yasuwe: 2325 0

Ethiopia – Tigray: Ibisasu bya rokete byaguye mu nkengero z’umurwa mukuru wa...

Ibisasu bya rokete byarasiwe mu karere ka Tigray ko mu majyaruguru ya...
15 November 2020 Yasuwe: 1274 0