Freeman Mbowe ukuriye ishyaka ritavuga rumwe n’ubutegetsi muri Tanzania CHADEMA kubiswe n’abantu bataramenyekana baramukomeretsa mu murwa mukuru Dodoma, ubu ari kuvurirwa mu bitaro byo muri uyu mujyi.

Sponsored Ad

Ishyaka rye rivuga ko Bwana Mbowe ubwo yariho ataha iwe mu rugo i Dodoma mu ijoro ryakeye yatezwe igico agakubitwa bikomeye nk’uko umunyamakuru wa BBC abivuga.

Byabaye hashize amasaha macye Tundu Lissu, undi munyapolitiki uzwi cyane wo muri iri shyaka, atangaje umugambi we wo guhatanira umwanya w’umukuru w’igihugu.

Tundu Lissu we ari mu Bubiligi aho yagiye kwivuriza nyuma yo kurokoka igikorwa cyo gushaka kumwica mu 2017.

Ishyaka CHADEMA ryatangaje ko uyu munsi risohora itangazo ry’amakuru arambuye ku byabaye ku urikuriye, gusa rivuga ko ari igikorwa gifite impamvu za politiki.

Polisi ya Tanzania ntacyo iratangaza ku byakorewe Bwana Mbowe.

Tanzania iritegura amatora y’umukuru w’igihugu mu kwezi kwa 10 uyu mwaka, biteganyijwe ko Perezida John Pombe Magufuli aziyamamariza kongera gutorerwa indi manda.

Mu kwezi gushize,Polisi yo mu mujyi wa Dar es Salaam muri Tanzania yatumije abadepite b’ishyakaCHADEMA kuza kubazwa nyuma y’uko banze kwitabira imirimo y’inteko kuko bafite ubwoba bwo kuhandurira coronavirus.

Mu ntangiriro za Gicurasi, ishyaka Chadema rikomeye mu yatavuga rumwe n’ubutegetsi, ryasabye abadepite baryo kwishyira mu kato iminsi 14 kandi ntibagere ku ngoro y’inteko ishinga amategeko iri i Dodoma.

Bafashe iki cyemezo nyuma y’urupfu rw’abadepite batatu mu gihe cy’ibyumweru bibiri - nubwo izo mfu zitahujwe na coronavirus.

Iri shyaka rifite abadepite 62 muri 383 bagize inteko ya Tanzania, hafi ya bose bumviye ishyaka ryabo ntibitabira imirimo y’inteko yarimo kwiga ku ngengo y’imari ya leta ya 2020/21.

Benshi mu banyapolitiki muri Tanzania baba i Dar es Salaam.

Ukuriye inteko ya Tanzania yavuze ko abo badepite banze kwitabira inteko bazafarirwa ibihano.

Yavuze ko bafashe icyo cyemezo baramaze kwishyurwa "agahimbazamusyi k’ubwitabire" bw’inama z’abadepite k’ibyumweru bibiri, kangana n’amadorari $48,000.

Uyobora inteko, yagize ati: "Mu magambo macye ni ubujura".

Komiseri Paul Makonda utegeka polisi mu mujyi wa Dar es Salaam mbere yari yahaye amasaha 24 abo badepite ba Chadema kuva muri uyu mujyi cyangwa bagafungwa.

Yavuze ko ibyabo azabikemura nk’uko mu gihe cyashize yakemuye ikibazo cy’abacuruza imibiri yabo. Benshi muri aba badepite bahise bamukabiriza ngo aze abafunge.

Inkuru ya BBC