Minisitiri w’intebe wa Cadi akaba n’umuyobozi utavuga rumwe n’ubutegetsi, Succes Masra, yatanze ibaruwa isezera ku mirimo ye.

Sponsored Ad

Ni nyuma y’uko perezida w’agateganyo, Mahamat Idriss Deby, yemejwe ko ari we watsinze itora rya perezida ryo kw’itariki ya 6 y’uku kwezi kwa gatanu.

Kuri uyu wa gatatu, ku rubuga X, Masra yagize ati: "Nkurikije itegeko nshinga, uyu munsi natanze ibaruwa y’ukwegura kwanjye, cyane ko guverinoma y’inzibacyuho, ntacyo ikivuze, nyuma y’itora rya perezida ryo kw’itariki ya 6 y’uku kwezi kwa gatanu.

Mbere yo gutangaza ku mugaragaro amajwi ya mbere yavuye mu matora, Masra, yatangaje ko yatsinze, avuga ko harimo hateganyijwe ubumamyi bw’amajwi.

Urwego rushinzwe amatora muri Cadi, rwavuze ko Deby yatsinze amatora burundu na 61% by’amajwi kandi akanama gashinzwe itegeko nshinga karebyemeje. Masra yemeye icyemezo cy’inama njyanama, avuga ko nta bundi buryo bwemewe n’amategeko bwo kwanga ayo majwi yatangajwe.

Masra utavuga rumwe n’agatsiko k’abasirikare kafashe ubutegetsi mu kwezi kwa kane umwaka wa 2021, yari yagizwe minisitiri w’intebe wa guverinoma y’inzibacyuho mu kwezi kwa mbere, amezi ane mbere y’amatora, mu buryo bwo gutuma abatavuga rumwe n’ubutegetsi, batuza.

Mu kwezi kwa gatatu, kandidatire ye yaremewe kugira ngo asubire mu gihugu maze yitabire itora rya perezida, ubuyobozi bwongere kugendera kw’itegeko nshinga.

Intsinzi ya Deby yongereye umuryango we igihe ku butegetsi. Uyu muryango wabugundiriye kuva se abufashe muri kudeta mu ntangirio ya za 90.

Igihugu cya Cadi gicukura peteroli, ni cyo cya mbere mu byibasiwe na kudeta mu karere ka Sahel, muri Afurika y’iburengerazuba no hagati.