Umunyamakuru Ahmadi Radjabu w’ikinyamakuru Akeza.net wari umaze ibyumweru bibiri afungiwe mu biro bikuru by’urwego rushinzwe iperereza mu mujyi wa Bujumbura, ubu yarekuwe nk’uko bitangazwa n’abamwegereye.

Sponsored Ad

Yafunzwe mu ijoro ryo ku wa kabiri Gicurasi arimo gufata amashusho akoresheje akadege katagira umupilote ku isoko rya Ruvumera ahari hadutse umuriro.

Ubuyobozi bw’ikinyamakuru Akeza.net bwavuze ko butaramenyeshwa icyo uwo mukozi ashinjwa.

Ubwo buyobozi buvuga ko iminsi 13 ari myinshi, bugatangazwa no kubona muri icyo gihe cyose butarigeze buhamagazwa ngo bwiregure.

Uwunganira Ahmadi Radjabu mu mategeko ngo yashoboye kubona umukiriya we rimwe gusa. Hari kuwa 3 Gicurasi.

Ariko ngo kuva icyo gihe ntibongeye kwemererwa kumubona nk’uko byakomeje kwemezwa n’ubuyobozi bw’ikinyamakuru Akeza.

Icyo kinyamakuru cyahise kiregera komisiyo ishinzwe uburenganzira bwa muntu CNIDH n’urwego rushinzwe kugenzura itangazamakuru CNC.

CNIDH ngo yemerewe kubona Ahmadi Radjabu.

Bivugwa ko ivuyeyo yabwiye Akeza.net ko hari iperereza uyu munyamakuru yarimo gukorwako, ariko ngo nta byinshi yasobanuye.

Uyu munyamakuru amaze kumenya ko isoko rya Ruvumera ririmo gushya bituma asubira ku kazi,afata drone,asaba ko n’ushinzwe gufata amafoto bajyana.

Bahageze batangiye gufata amashusho ariko abashinzwe umutekano bahita bamuta muri yombi.

BBC