Umukinnyi w’iteramakofe ukomoka muri Nigeria, Sherif Lawal, yapfuye nyuma yo gukubitwa igipfunsi kiremereye mu mukino we wa mbere nk’uwabigize umwuga.

Sponsored Ad

Ku cyumweru, tariki ya 12 Gicurasi 2024, uyu musore wari uhagarariye UK,yinjiye mu kibuga ku mukino we wa mbere nk’uwabigize umwuga, ahanganye na Malam Varela wo muri Portugal mu kibuga cya Harrow Leisure Centre.

Uyu mukinnyi w’iteramakofe w’imyaka 29 y’amavuko yagombaga gukina uduce dutandatu,gusa yakubiswe igipfunsi yikubita hasi mu gace ka kane.

Gukubitwa igipfunsi kiremereye mu gace ka kane byamuteye kugwisha isura hasi,hahita hahamagazwa ubuvuzi bwihutirwa.Uyu yishwe no gukomereka mu mutwe.

Nubwo yahise ajyanwa mu bitaro igitaraganya na ambulance, Lawal byatangajwe ko yapfuye akimara kuhagera.

Ubuyobozi bwa Warren Boxing Management,bwamamaje uyu murwano, bwagaragaje ko bwababaye cyane,buti: “Ikibabaje mu murwano wa Sherif yaguye, kandi nubwo abatabazi bashyizeho umwete, nyuma byaje gutangazwa ko yapfuye.”

Akanama gashinzwe kugenzura iteramakofe mu Bwongereza kihanganishije umuryango wa Lawal kagira kati: “Twihanganishije umuryango wa Sherif Lawal nyuma y’urupfu rwe rubabaje."

Uyu mukino wari uwa mbere kuri uriya mugoroba aho urupfu rwa Lawal rwatumye indi mikino yari iteganyijwe ihagarikwa.