Burera: Abakiristo bane bo muri ADEPR barohamye mu kiyaga

10 January 2017. | Mu Rwanda | 1 Ibitekerezo | Nsanzimana Ernest
  • MyPassion

Abakiristo ba ADEPR mu mirenge itandukanye y’ Akarere ka Burera bagiye gusengera ahazwi nko ku ibuye rya Ruganzu yarohama mu kiyaga umwe ararokoka, undi arohorwa yapfuye babiri baburirwa irengero.

Ku munsi w’ ejo tariki ya 9 Mutarama 2017, nibwo abakiritso bane barimo abakobwa batatu n’ umugore umwe bagiye gusengera ku Ibuye rya Ruganzu riherereye ku nkombe z’ ikiyaga cya Burera mu gutaha bose barohama muri iki kiyaga.

Abo bakiristo ni Nyirarukundo Denise 18 ari nawe warokotse, Kampire Alice w’ imyaka 19, Mahirwe Marie José w’ imyaka 25 uzwi ku izina rya Mama Ange (Ni we mugore wari ubarimo) na Ndacyayisenga Beatrice w’ imyaka 23.

Umuvugizi wa Polisi mu ntara y’ amajyaruguru IP Innocent Gasasira yabwiye Umuryango ko aba bakiristo barohamye ku isaha ya kumi ubwo bari basoje amasengesho yabo batashye.

Yagize ati “Hari urutare rushoka mu kiyaga cya Burera ubwo bari batashye nirwo banyereyeho bose barohama mu kiyaga”

Umunyamabanga Nshingwabikorwa w’ Umurenge wa Rugarama iri sanganya ryabereyemo Mbarushimana Emmanuel yabwiye Umuryango ko abarobyi bo muri iki kiyaga batabaye uwitwa Nyirarukundo Denise wari wahagamye mu rutare atarengewe n’ amazi, banakuramo umurambo wa Mahirwe Marie José

Ubwo twateguraga iyi nkuru umurambo wa Mahirwe wari utarashyingurwa. Abaturage ku nkombe z’ iki kiyaga nabo bari bagitegereje ko imirambo ibiri igishakishwa izamuka.

IP Gasasira yavuze ko Nyirarukundo warohowe ari muzima ubuzima bwe bumeze neza.

Muri aba bakiristo uko ari bane batatu ni abo mu murenge wa Kagogo undi umwe ni uwo mu murenge wa Cyanika. Barohamye mu murenge wa Rugarama Akagari ka Rurembo

Mbarushimana avuga ko aha hantu barohamye badasanzwe bahasengera.

IP Gasasira na Mbarushimana bahuriza ku gusaba Abanyarwanda ko mbere yo gukorera igikorwa icyo ari cyose ahantu, bajya babanza kureba niba aho hantu hadashobora gushyira ubuzima bwabo mu kaga.

    Facebook Twitter Addthis
Ibitekerezo
  • MyPassion

    theo
    11 January 2017 - Musubize

    aba bana Imana ibakire mubayo

Tanga Igitekerezo