Faustin Nkusi yagaragaje ikihishe inyuma yo kuba hashize imyaka irenga 20 hari abakoze Jenoside batarafatwa

11 January 2017. | Mu Rwanda | 1 Ibitekerezo | Nsanzimana Ernest
  • MyPassion

Umuvugizi w’ ubushinjacyaha bw’ u Rwanda Faustin Nkusi yagaragaje impamvu eshatu zikomeye zituma u Rwanda rutoroherwa no guta muri yombi abakekwaho uruhare muri Jenoside yakorewe abatutsi bahishahisha mu bindi bihugu.

Nkusi avuga ko imyaka irenga 20 abakoze Jenoside batarafatwa ari ikibazo gikomeye gusa yongeraho ko byatewe n’impamvu eshatu zirimo n’ amananiza ibihugu bicumbikiye abakekwaho Jenoside bishyira ku Rwanda.

Yagize ati “Ibihugu byinshi bicumbikiye aba bantu nta bushake bifite bwo kubohereza, ntabwo biha uburemere iki kibazo kandi twebwe buri gihe tugaragaza ko ari ikibazo gikomeye, ndetse tunohereza impapuro zisaba ko bafatwa bakazanwa mu Rwanda cyangwa bakagezwa imbere y’ ubutabera mu nkiko zabo, ariko ubona ubushake bwo kugira ngo babageze imbere y’ ubutabera cyangwa se babaduhe nta buhari”

Akomeza avuga ko indi mpamvu ishingiye kukuba abakekwaho uruhare muri jenoside bahindagura imyirondoro n’ ibihugu.

Ati “Ikindi ni uko aba bantu bahindura za aderesi zabo, bagahindura imyirondoro, bagahindura aho bari batuye bakimuka bakajya ahandi. Niba umuntu yari muri Zambia akamenya ko ashakishwa akimuka akajya muri Afrika y’ Epfo bituma kubashakisha bikomeza kuba ikibazo”

Impamvu ya gatatu ngo ni ukuba hari ibihugu byanga guta muri yombi abakekwaho uruhare muri jenoside yakorewe abatutsi bikabwira u Rwanda ko nta masezerano rufitanye nabyo.

Faustin yunzemo ati “Ibihugu byinshi bimaze kutubwira ko nta masezerano tugirana yo guhanahana abanyabyaha, nabyo bikunze kuba imbogamizi kandi bitakabaye imbogamizi kuko ibi byaha n’ ibyaha mpuzamahanga(Jenoside n’ ibyaha bifitanye isano nayo) ibi bihugu bitegetswe gukurikirana aba bantu”


Umuvugizi w’ ubushinjacyaha Faustin NKUSI

Umuvugizi w’ ubushinjacyaha yabwiye Radio Isango Stars ko u Rwanda rutazahwema kumvikanisha mu mahanga ko abakoze Jenoside bagomba gutabwa muri yombi bakaburanishwa.

    Facebook Twitter Addthis
Ibitekerezo
  • MyPassion


    11 January 2017 - Musubize

    Mwatunyongeye comments mwakoze

Tanga Igitekerezo