Hatangajwe akayabo k’amamiliyari y’u Rwanda k’ibyahiriye mu nkongi y’umuriro yibasiye Agakiriro ka Gisozi,Abacuruzi nabo bagaragaje agahinda kabo[AMAFOTO]

Amakuru   Yanditswe na: Martin Munezero 1 July 2019 Yasuwe: 2903

Agakiriro ka Gisozi kongeye kwibasirwa n’inkongi y’umuriro nyuma y’uko kaherukaga gushya na none mu ntangiriro z’uku kwezi, bivuze ko gahiye inshuro ebyiri mu kwezi kumwe.



Iyo nkongi yadutse ku gicamunsi cyo kuri uyu wa gatandatu tariki 29 Kamena 2019 ije ikurikira iyahabaye tariki 03 Kamena 2019.

Igice gikomeje gushya ni ikiri haruguru y’umuturirwa witwa UMUKINDO, aho kuri iyi nshuro hasigaye agace gato ugereranyije n’ahamaze gushya.

Abaturage babibonye bavugaga ko umwe mu bacuruzi witwa Jonas wahishije ibicuruzwa bye ku nshuro ya kabiri, ngo yendaga kwiroha mu muriro kugira ngo umutwikane n’imitungo ye.

Uwitwa Egide uzwi ku izina rya Dizayina w’umubaji, akomeza arondora ingaruka zizakurikiraho nyuma yo gushya kw’Agakiriro kari gatunze imiryango y’Abanyarwanda babarirwa mu bihumbi

Agira ati” Ku bantu bari bahafite ibicuruzwa n’abahakorera tugiye gukena. Niba waryaga kabiri ku munsi, urarya rimwe nabwo bikugoye”.

Akomeza asobanura ko hari ihungabana rigiye kwibasira ba nyir’ibicuruzwa hamwe n’imiryango y’abantu bari bahafite akazi ka buri munsi.

Ubushobozi bw’abantu bwo kugura ibintu bitandukanye ngo bugiye kugabanuka kuko nta mafaranga bazaba bagifite.

Vuguziga Faustin ucuruza “triplex” aho mu Gakiriro agira ati” ubu se ko abantu baguraga ibicuruzwa byanjye bitewe n’ibyo bakoresheje hariya hahiye, ubu hari ifaranga nzongera gukoraho, reka da!”

Akomeza asobanura ko ibikoresho byo mu nzu nk’intebe, ameza ndetse n’iby’ubwubatsi nk’inzugi n’amadirishya, ngo bigiye guhenda cyane bitewe n’ububiko bw’imbaho bwahakongokeye.

Hari n’abandi baturage bakomeza bagaragaza uburyo amabanki akorera mu Gakiriro nayo ashobora guhomba bitewe n’uko ubucuruzi n’imishahara abantu bahembwaga byose bihagaze.

Hari n’abagaragaza ko bitewe n’uko “banki zitajya zemera guhomba”, zizahitamo guteza cyamunara imitungo y’abantu bari barasabye imyenda kugira ngo bacururize mu Gakiriro.

Dizayina(Designer) akomeza asaba inzego zitandukanye gushaka uburyo zashumbusha abantu bahombeye imitungo yabo mu Gakiriro kubera inkongi.

Kugeza ubu nta muntu urabasha gusobanura impamvu ya nyayo itera inkongi y’umuriro mu Gakiriro, uretse ko ababonye itangira bavuga ko udushashi tw’umuriro w’amashanyarazi mu nsinga zo hejuru ari two twayikongeje.

Ibimodoka bishinzwe kuzimya umuriro bya Polisi n’Ingabo z’u Rwanda bikomeje kugerageza kuzimya iyi nkongi yatangiye ahagana saa kumi n’ebyiri z’umugoroba, ariko bikaba bigejeje saa tatu bitarayicogoza.

Umunyamabanga Nshingwabikorwa w’Ishyirahamwe APARWA, Emmanuel Benegusenga yabwiye abanyamakuru ko ibyahiye bagereranyije basanga bifite agaciro ka Miliyari 7,7 z’amafaranga y’u Rwanda.

Ngo abo yaraye avuganye na bo bose bamubwiye ko bafite ubwishingizi kereka abo mu mbaho.

Yanavuze ko hahiye shitingi 79, ibyari mu bubiko, imbaho, imashini n’ibindi.

Author : Martin Munezero

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Guciririkanwa n’umumotari muri 2020 bizaba ari amateka

Kuri uyu wa Mbere tariki 2 Ukuboza i Kigali ,ikigo cy’ikoranabuhanga cyo...
4 December 2019 Yasuwe: 1444 0

Prof.Sam Rugege yasimbujwe ku buyobozi bw’urukiko rw’ikirenga

Kuri uyu wa Gatatu tariki 4 Ukuboza 2019, Perezida wa Repubulika, Paul...
4 December 2019 Yasuwe: 3586 0

Rubavu:Ba Gitifu 10 basezeye ku mirimo yabo

Ubuyobozi bw’Akarere ka Rubavu bwemeje ko hari abanyamabanga Nshingwabikorwa...
4 December 2019 Yasuwe: 3316 0

Ababyeyi basabwe kutajya gushaka amashuri y’abana babo mu bihugu bituranye...

Minisitiri w’Uburezi, Dr Eugène Mutimura, yasabye ababyeyi kwirinda guhora...
4 December 2019 Yasuwe: 1324 1

Abakozi bo mu irimbi bafashwe bari kunywa inzoga bashyinguranye umurambo...

Umugore witwa Sue Stott w’imyaka 50 yafashe abagabo bakora mu irimbi bari...
3 December 2019 Yasuwe: 2951 1

Perezida Kagame asanga icyorezo cya SIDA ari ikintu gikwiye guhagurukirwa...

Ubwo Perezida wa Repubulika y’u Rwanda Paul Kagame yatangizaga ku mugaragaro...
3 December 2019 Yasuwe: 546 0