Umunyamabanga Nshingwabikorwa w’Akagari ka Gatobotobo mu Karere ka Huye,intara y’Amagepfo afunzwe akurikiranweho icyaha cyo kugerageza kwaka ruswa ishingiye ku gitsina umukobwa utuye mu kagari ayobora wamuabye ibyangombwa akamusiragiza.

Sponsored Ad

Nkuko amakuru dukesha IGIHE abitangaza, uyu muyobozi arakekwaho icyaha cyo gusaba ruswa ishingiye ku gitsina uyu mukobwa utuye mu Kagari ayoboye nyuma y’uko amusabye ibyangombwa akamusiragiza kugeza igihe amusabye kumusanga mu biro bye nijoro.

Urwego rw’Igihugu rushinzwe Ubugenzacyaha, RIB, rwemeje ko uwo muyobozi afunzwe kuko ari gukorwaho iperereza ku cyaha akekwaho cya ruswa ishingiye ku gitsina.

Umuvugizi wa RIB, Mbabazi Modeste, yemeje ko uwo muyobozi yaguwe gitumo ku mugoroba wo ku wa Gatanu tariki ya 22 Gashyantare 2019 ashaka gusambanyiriza umukobwa mu biro by’Akagari.

Mbabazi avuga ko uwo mukobwa akimara kubona ko akomeje gusiragizwa kandi uwo muyobozi ari kumusaba kujya mu biro bye nijoro amubwira n’amagambo yerekeza ku kumutereta, yagize amakenga yitabaza RIB.

Yagize ati “Yakomeje kumusiragiza noneho atangira no kumutereta mu buryo butandukanye aramubwira ngo amusange mu biro saa moya z’umugoroba. Ubwo umukobwa yahise abimenyekanisha turamubwira ngo agende arebe ibyo ashaka.

Yagezeyo atangira imihango yo kumusambanya ariko ntabwo yabigezeho kuko yabiteshejwe n’abagenzacyaha bahise bahagera.”

Kuri ubu uwo muyobozi afungiye kuri sitasiyo ya Polisi ya Ngoma mu Karere ka Huye ndetse ari gukorwaho iperereza kugira ngo ashyikirizwe ubushinjacyaha.