Tugiye kongera igiciro cy’umutekano wacu kuri buri wese ushaka kuwuhangabanya-Perezida Kagame

Amakuru   Yanditswe na: Dusingizimana Remy 14 November 2019 Yasuwe: 4814

Perezida Kagame yaburiye abashaka guhungabanya umutekano w’u Rwanda ko bazishyura igiciro kiremereye kuko igihugu cyiteguye gukora ibishoboka byose kugira ngo umutekano w’Abanyarwanda usagambe.



Ibi nyakubahwa perezida wa Repubulika yabitangarije mu muhango wabereye mu ngoro y’inteko ishinga amategeko w’irahira ry’abaminisitiri bashya muri Guverinoma hamwe n’abandi bayobozi mu nzego zitandukanye z’igihugu baherutse kugirirwa icyizere.Uyu muhango wabaye kuri uyu wa Kane taliki ya 14 Ugushyingo 2019.

Mu ijambo rye perezida wa Repubulika yabanje gushimira abarahiye,abibutsa ko inyungu zabo zigomba kuza inyuma y’iz’abaturage bagiye gukorera aho yanabasabye gukomeza gukora ibyo bafite mu bushobozi bwabo.

Perezida Kagame yahise yitsa ku mutekano w’igihugu aho yavuze ko Abanyarwanda bari bamaze gufata umutekano nk’ikintu gisanzwe ndetse batakiwuha agaciro cyane ariko yemeza ko igihugu kigiye kongera igiciro cyawo ku bantu bashaka kuwuhungabanya.

Yagize ati “Umutekano rero ubundi aho twari tugeze, twari tumaze kuwumenyera nk’ibintu bisanzwe, nta n’igishobora kuwuhungabanya.Ntabwo twari tukiwutindaho cyane.

Tugiye kurushaho kwereka abanzi bacu ko umutekano ufite agaciro cyane. Icyo nshaka kuvuga n’uko tugiye kuzamura igiciro,kuzamura igiciro, kuri buri wese ushaka kuwuhungabanya.Igiciro kigiye guhenda bihanitse bivuze ko tugiye kureba ko dufite buri kimwe cyatwemeza ko dufite umutekano w’abaturage bacu,igihugu cyacu,n’iterambere ryacu.Abo bantu bashaka guhungabanya umutekano wacu bagiye kwishyura igiciro gihanitse,kandi murabizi ko imvugo yanjye ariyo ngiro.

Perezida Kagame yaburiye abantu bakomeje kwihisha inyuma ya za politiki z’amacakubiri n’ingengabitekerezo bari mu gihugu ko bakwiriye guhinduka vuba bitaba ibyo bakazahura n’ingaruka mbi.

Yagize ati “ Ndashaka kuburira bamwe muri twe bihishe inyuma y’ibintu bitandukanye birimo politiki,demokarasi,ubwisanzure n’ibindi ko ari inshingano zacu gutanga demokarasi,ubwisanzure,amahoro na buri kimwe mu gihugu cyacu,nitwe ba mbere bireba,twebwe njye nawe.Abandi bihishe inyuma y’ubwo bujiji bashyigikiwe ndetse bashimwa n’abantu bari hanze bakaryoherwa,muraza kutubona.Ababirimo bashaka bakwisubiraho vuba vuba,vuba vuba.Tuzabashyira aho mugomba kuba muri.

Abantu bagize uruhare mu mahano ya jenoside ariko bakaba bagikina politiki y’ingengabitekerezo,barafunzwe barafungurwa,turababarira ariko batangiye gukina iyo mikino nanone,tuzabashyira aho mukwiriye kuba muri.Abavuza induru kuri byo tuzashaka icyo tubakorera. Ndabwira abo bakomeje gukina iyo mikino y’ubujiji bashaka kudusubiza aho twavuye.”

Perezida Kagame yavuze ko abasakuriza mu bihugu by’abaturanyi no hirya no hino ku isi abirengagiza ariko uzibeshya akarenga umupaka akinjira mu Rwanda guhungabanya umutekano, atazamusobanurira ko ashoboye guhangana nawe ahubwo azamwereka ako kanya ko bahangana.

Perezida Kagame yasoje avuga ko abanyarwanda bagomba kurinda umutekano byanze bikunze kandi ngo n’uruhare rwa buri wese mu nzego zose kugira ngo umutekano ukomeze usagambe.

Perezida Kagame yijeje abayobozi bose ko hakwiriye ubufatanye ndetse abemerera inkunga muri ubwo bufatanye cyane ko buri wese abifitemo inyungu,anaboneraho kubasaba ko ubukungu n’imibereho myiza byakomeza kwiyongera no kunoza imiyoborere ituma bigerwaho.

Abarahiye kuba abaminisitiri barimo Jeanne d’Arc Mujawamariya wagizwe Minisitiri w’Ibidukikije; Gen Patrick Nyamvumba wagizwe Minisitiri w’Umutekano na Aurore Mimosa Munyangaju wagizwe Minisitiri wa Siporo.

Harimo kandi Edouard Bamporiki wagizwe Umunyamabanga wa Leta muri Minisiteri y’Urubyiruko n’Umuco na Ignatienne Nyirarukundo wagizwe Umunyamabanga wa Leta muri Minisiteri y’Ubutegetsi bw’Igihugu ushinzwe imibereho myiza y’abaturage.

Harimo kandi Gen Jean Bosco Kazura wagizwe Umugaba Mukuru w’Ingabo z’u Rwanda; Umugaba Mukuru w’Inkeragutabara,Gen Fred Ibingira; Umugaba Mukuru wungirije w’Inkeragutabara, Gen Maj Innocent Kabandana n’Umugenzuzi Mukuru (Inspector General) wa RDF, Lieutenant General Jacques Musemakweli.

Author : Dusingizimana Remy

Ibitecyerezo

  • Log in

    Amategeko n'amabwiriza birkurikizwa


  • chat_bubble Kazungu

    nibyo umutekano w’igihugu niwo number 1.Twese tugomba kuwugiramo uruhare kuko iyo uhungabanye abaturage bose bibagiraho ingaruka.

    3 weeks ago
  • chat_bubble Kazungu

    nibyo umutekano w’igihugu niwo number 1.Twese tugomba kuwugiramo uruhare kuko iyo uhungabanye abaturage bose bibagiraho ingaruka.

    3 weeks ago

Inzindi nkuru

Uwanyirigira Marie Chantal yatorewe kuyobora akarere ka Burera

Yasimbuye kuri uyu mwanya Uwambajemariya Florence wagizwe Umunyamabanga...
6 December 2019 Yasuwe: 1375 0

Abadepite mu Nteko Ishinga Amategeko y’u Rwanda bagiye kwegera abaturage mu...

Abadepite mu Nteko Ishinga Amategeko y’u Rwanda bagiye kwegera abaturage mu...
6 December 2019 Yasuwe: 423 0

Rusizi: Umukecuru yateye imboga nyinshi kugira ngo ajye aziha abaturanyi be...

Umukecuru witwa Mukangwije Thacienne ukomoka mu karere ka Rusizi mu...
4 December 2019 Yasuwe: 3458 1

Guciririkanwa n’umumotari muri 2020 bizaba ari amateka

Kuri uyu wa Mbere tariki 2 Ukuboza i Kigali ,ikigo cy’ikoranabuhanga cyo...
4 December 2019 Yasuwe: 1586 0

Prof.Sam Rugege yasimbujwe ku buyobozi bw’urukiko rw’ikirenga

Kuri uyu wa Gatatu tariki 4 Ukuboza 2019, Perezida wa Repubulika, Paul...
4 December 2019 Yasuwe: 3743 0

Rubavu:Ba Gitifu 10 basezeye ku mirimo yabo

Ubuyobozi bw’Akarere ka Rubavu bwemeje ko hari abanyamabanga Nshingwabikorwa...
4 December 2019 Yasuwe: 3471 0