Karongi: Abagabo babiri bafatanywe magendu y’amabuye y’agaciro yo mu bwoko bwa Gasegereti

Amakuru   Yanditswe na: Iyamuremye Janvier 15 July 2017 Yasuwe: 349

Polisi y’u Rwanda mu turere twa Karongi na Ngororero yafatanye abagabo babiri magendu y’amabuye y’agaciro yo mu bwoko bwa Gasegereti na Amethyst.

Umuvugizi wa Polisi y’u Rwanda mu Ntara y’i Burengerazuba, Chief Inspector of Police (CIP) Theobald Kanamugire yavuze ko abayafatanwe ari Manirarora Emmanuel na Nzabonimpa Vincent.

Yavuze ko ku itariki 13 z’uku kwezi Manirarora yafatiwe kuri bariyeri ya Polisi yo mu kagari ka Ruragwe, mu murenge wa Rubengera, akarere ka Karongi afite ibiro 124 bya Gasegereti ya magendu.

Yagize ati,"Polisi yagize amakenga y’ibintu byari mu mifuka yari ipakiye mu modoka we n’abandi bantu barimo irayihambura; maze isangamo ayo mabuye y’agaciro; hanyuma ibajije nyirayo, Manirarora asubiza ko ari aye."

CIP Kanamugire yongeyeho ko ku itariki 12 Nyakanga uyu mwaka mu nzu ya Nzabonimpa, iri mu kagari ka Cyome, mu murenge wa Gatumba, mu karere ka Ngororero, Polisi yahafatiwe ibiro 24 bya Gasegereti na bitanu bya Amethyst.

Yagarutse ku buryo yabifatanwe agira ati, "Polisi yabonye amakuru y’uko agura akanacuruza amabuye y’agaciro mu buryo butubahirije amategeko. Yasatse inzu ye isangamo ayo mabuye y’agaciro ya magendu."

Yavuze ko amabuye y’agaciro aba bombi bafatanwe ari forode kubera ko batagaragaje ibyangombwa basabwe birimo ibibemerera kuyagura no kuyacuruza; kandi ko ayo mabuye y’agaciro atari afunze n’ubujeni.

Umuvugizi wa Polisi y’u Rwanda mu Ntara y’i Burengerazuba yongeyeho ko amabuye y’agaciro ya forode aba adaherekejwe n’impapuro zabugenewe zigaragaza uko yakurikiranwe n’uburyo yarinzwe nk’uko biteganywa n’Amabwiriza ya Minisitiri w’Umutungo Kamere No 002/2012/MINIRENA yo ku wa 28/03/2012 agena uburyo bw’iyubahirizwa ry’ubuziranenge bw’amabuye y’agaciro mu karere, mu ngingo yayo ya 15.

Yibukije ko nta muntu wemerewe kugura cyangwa gucuruza amabuye y’agaciro atanditse mu bitabo by’ubucuruzi nk’uko biteganywa n’ingingo ya 10 y’aya Babwiriza.

Ifatwa ry’iyi forode (ibiro 148 bya Gasegereti na bitanu bya Amethyst) ribaye nyuma y’aho ku itariki 5 z’uku kwezi Polisi y’u Rwanda mu karere ka Ngororero na none ihafatiye uwitwa Harerimana Sylvestre apakiye toni n’ibiro 46 bya Koluta (Coltan) ya forode mu modoka yo mu bwoko bwa Toyota Land Cruiser ifite nimero ziyiranga RAB 038 E.

Na none ku itariki 17 Gicurasi uyu mwaka, Polisi muri aka karere yafashe Niyifasha Jean apakiye ibiro 173 bya Wolfram ya forode mu modoka yo mu bwoko bwa Land Cruser ifite nimero ziyiranga RAC 251.

Ingingo ya 16 y’aya Mabwiriza ya Minisitiri w’Umutungo Kamere ivuga ko umuntu wese ufatiwe mu bucuruzi bw’amabuye y’agaciro mu buryo bwa forode ahanishwa ibihano biteganywa n’ingingo ya 103 y’Itegeko no 37/2008 ryo ku wa 11/08/2008 rigenga ubucukuzi bw’amabuye y’agaciro na kariyeri.

Mu butumwa bwe, CIP Kanamugire yagize ati,"Magendu idindiza ubukungu n’iterambere by’igihugu. Buri wese akwiriye kuyirinda no kugira uruhare mu kuyirwanya atungira agatoki inzego zibishinzwe abo akekaho iki cyaha."

Yagiriye inama abacukura n’abacuruza amabuye y’agaciro gukurikiza amategeko abigenga.

Mu nzu ya Nzabonimpa kandi, Polisi yahafatiye kandi amaduzeni 17 y’inzoga yo mu masashe yitwa Blue Sky itemewe mu Rwanda.

Yavuze ko Nzabonimpa afungiwe kuri Sitasiyo ya Polisi ya Gatumba; naho Manirarora akaba afungiwe ku ya Rubengera; kandi ko ayo mabuye y’agaciro ndetse n’izo nzoga zitemewe bibitse kuri izo Sitasiyo za Polisi mu gihe iperereza rikomeje.

Author : Iyamuremye Janvier

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Mbigenze nte ? Umugore wanjye yahukanye kuko nta kibasha gutera...

Umusomyi w’ UMURYANGO yatwandikiye agira ngo umugire inama y’icyo yakora...
15 November 2017 Yasuwe: 832 2

Nyarugenge: Abantu 3 bakurikiranyweho ubwambuzi bw’asaga Miliyoni...

Polisi y’u Rwanda mu karere ka Nyarugenge ifunze abagabo batatu bakekwaho...
13 November 2017 Yasuwe: 1533 0

Musanze: Umubyeyi w’ abana bane yakuyemo inda abeshya abaganga ko yagiye mu...

Umubyeyi Twahaye izina rya Mukanama wo mu murenge wa Muko mu karere ka...
13 November 2017 Yasuwe: 2396 0

Bishop Rugagi yashyize hanze amabanga ya Bahati uherutse ku mushinja...

Umupasiteri umaze kwamamara mu Rwanda no hanze yarwo biturutse ku...
11 November 2017 Yasuwe: 3167 0

Imyitozo y’Ingabo z’u Rwanda ubwo zagaragarizaga Perezida Kagame ubuhanga...

Perezida wa Repubulika y’u Rwanda Paul Kagame, kuri uyu wa Gatanu yitabiriye...
11 November 2017 Yasuwe: 4758 0

Bishop Rugagi yatamaje umusaza wamwiyitiriye

Umushumba mukuru w’ itorero Redeemed gospel church Bishop Innocent Rugagi...
11 November 2017 Yasuwe: 2999 0