#Kwibuka25:Ubuhamya bw’ubuzima busharira Munyeshoza yanyuzemo afite imyaka 16 aho yafungiwe mu buvumo nyuma akaza kwerekeza mu gisirikare cy’Inkotanyi

Amakuru   Yanditswe na: Martin Munezero 11 April 2019 Yasuwe: 2337

Munyanshoza benshi bamuzi nka Mibirizi kubera indirimbo yo kwibuka yaririmbiye Mibirizi agace yavukiyemo kuwa 25 Nzeri 1975, ahitwa i Kimbogo ahahoze ari Perefegitura ya Cyangugu ubu ni mu Ntara y’Uburengerazuba.

Munyanshoza Dieudonné, ni umwe mu barokotse Jenoside yakorewe Abatutsi wanafashe iya mbere mu kuririmba indirimbo zomora ibikomere abarokotse ubu bwicanyi bwahitanye abasaga miliyoni.

Umuryango we na benshi mu bavandimwe be biciwe muri Jenoside yabereye ku musozi wa Mibirizi ahaguye abatutsi babarirwa mu bihumbi. Icyo gihe, we yari ku rugamba rwo guhagarika ubu bwicanyi mu gisirikare cy’Inkotanyi.

Yavuye i Mibirizi mu 1991, icyo gihe ni nabwo yafungiwe muri Gereza ya Gitarama mu gihe cy’amezi atandatu ashinjwa kuba icyitso cy’inkotanyi. Yafunzwe afite imyaka 16, akirekurwa yahise ajya mu gisirikare.

Munyanshoza Dieudonné avuga ko igitekerezo cyo gukora ‘Mibirizi’, indirimbo ye yamenywe na benshi yakigize ubwo yahasuraga mu 1995 Jenoside imaze guhagarikwa, agasanga hasigaye amatongo n’imfubyi bitandukanye n’uburyo mbere hari heza. Yari yaragiye ku rugamba rwo kubohora igihugu mu 1993.

Munyanshoza avuga ko yafunzwe mu byitso muri Gereza ya Gitarama nubwo ari Umunya-Cyangugu, akumva ko byatewe n’uburyo ahandi hari huzuye, basanga ho hasigaye ‘Cave’ yo Munsi bivugwa ko yanafungiwemo Gitera kera.

Ati “Harimo kasho nyinshi ariko kamwe kagenewe gufungirwamo umuntu umwe ariko twe twagafungirwagamo turi abantu nka 12. Twahabaye amezi atandatu tutinyagambura, iyo bazanaga ibiryo cyangwa wenda tugiye gukaraba mu maso nibwo wagiraga amahirwe ukarambura amaguru. Aho abenshi ni ubwo buzima twabayemo.”

“Ndibuka ko tujyamo twasanzemo ibintu by’ibitagangurirwa… Reba ahantu hadaheruka abantu, kumara amezi atandatu uri ku isima gusa. Hari imishyikirano yabaye, Inkotanyi zisaba ko abantu bafungurwa, abitwaga ibyitso babafunguye muri rusange hose, nibuka ko haje ama-bus ajyana abantu aho baturutse.”

Munyanshoza icyo gihe ngo yamaze iminsi yindi itatu afunzwe wenyine mu bo bitaga ibyitso ariko abandi bafunzwe hejuru ya ‘cave’ bakamwibazaho uko we yasigayemo wenyine na we atazi uko byagenze. Bamusohoyemo ku bugorobye ngo yibaza uko azagera i Cyangugu. Yari afite amafaranga 150.

Mu gusohoka ngo yagiye ahantu hari ‘restaurant’ ngo agure icyayi yumve uko isukari atari aherutse imeze. Yari afite ikibari cyo kujya i Cyangugu gusa ariko afata inzira ijya i Kigali yurira imodoka yabonye imwegeza imbere. Yageze ku Kamonyi ibirenge byabyimbye, abantu baramuzitira amaze kwerekana icyangombwa yari yahawe, abasirikare bamuhata ibibazo mu muferege abakizwa na lifuti bari babonye. Yaraye mu ishyamba icyo gihe.

Yanyuze kuri bariyeri ya Nyabarongo abifashijwemo n’uwitwaga ‘Mitwe ibiri’ bari baziranye iwabo, ageze i Kigali abaza aho mukuru we yari atuye ajyayo. Yagiye mu gisirikare avuye i Kigali, yabanje gukora muri Roi Faysal.

Munyanshoza avuga ko ubuhanzi bwe bwatangiye akiri umwana muto cyane, ngo yakundaga kuririmba indirimbo zose ziri kuri radiyo. Bikomerera cyane mu gisirikare ubwo babaga bari muri ‘morale’ niho yabitangiriye.

Ati “Ariko noneho indirimbo nakoze ya mbere yitwaga ‘Urukundo ruzira icyasha’ ivuga ku basirikare baguye ku rugamba, n’ubu ijya icaho [kuri radiyo], ariko iya mbere nasohoye ikoze ni iyi yitwa ‘Mibirizi’, ikurikirwa n’iyitwa ‘Umunsi wandutiye indi’, ‘Umwari’ n’iyo ngiyo ya mbere.”

Avuga ko yabanje kuririmba agasozi k’iwabo ka Mibirizi, ngo byamuteye umwete wo gukora indirimbo ku tundi dusozi nk’iyitwa ‘Imfura zo ku Mugote’, ‘Nyanza ya Butare’, ‘Twarabakundaga’ zose zasohokeye rimwe.

Mibirizi afite ubuhamya bukomeye bw’abantu bamusuye bakamuha inka bati “Uzi ko wazuye ababyeyi bacu!”. Yifashishije amashusho yahawe n’inshuti ze zirimo n’umuzungu wari warafashe ubukwe bwo ku Mugote.

Muri iki gihe u Rwanda rwibuka ku nshuro ya 25, Munyanshoza afite indirimbo nshya yitegura gusohora zirimo iyitwa ’Iwacu Heza’ na ’Kwiyubaka Birakubera’.

Author : Martin Munezero

Ibitecyerezo

  • Log in

    Amategeko n'amabwiriza birkurikizwa


Inzindi nkuru

Habumuremyi yasobanuye inzira yanyuzemo kugira ngo imodoka imusige nyuma...

Habumuremyi Jean Baptiste bakunze kwita ‘John’ utuye mu Mujyi wa Muhanga mu...
19 July 2019 Yasuwe: 6093 1

Perezida Kagame yifatanyije n’umuryango wa senateri Bishagara washyinguwe...

Nyakubahwa perezida wa Repubulika Paul Kagame yifatanyije n’umuryango wa...
19 July 2019 Yasuwe: 4643 0

Nyiringabo Claudine witeguraga ubukwe yaguye mu mpanuka y’imodoka ajya...

Umukobwa witwa Claudine Nyiringabo wo mu Murenge wa Macuba mu Karere ka...
19 July 2019 Yasuwe: 6745 2

KICUKIRO:Ikamyo nini itwara amavuta yaturitse ihitana ubuzima...

Abantu babiri bahitanywe n’ iturika ry’ ikamyo itwara amavuta yasudirwaga n’...
19 July 2019 Yasuwe: 3145 0

Rulindo: Umurambo wa DASSO wavumbuwe mu ishyamba n’abana bashakaga...

Umu DASSO witwa Nshimiyimana Denis wakoreraga mu murenge wa Cyinzuzi mu...
18 July 2019 Yasuwe: 2495 0

Umunyamakuru Constantin Tuyishimire wa Radio na TV1 yaburiwe...

Umunyamakuru witwa Constantin Tuyishimire wakoreraga Radio na TV1 I Gicumbi...
18 July 2019 Yasuwe: 10468 0