startimes

Moto zitubahirije amabwiriza yo kurwanya Coronavurus zatangiye gupakirwa no gucibwa amande

Amakuru   Yanditswe na: Martin Munezero 4 June 2020 Yasuwe: 2144

Mu gitondo cyo kuri uyu wa Gatatu, tariki ya 3 Kamena 2020, ni bwo umunsi wari utegerejwe cyane ku batwara moto washyitse nyuma y’’iminsi ibiri usubitswe, bitewe n’ubwandu bushya bwa COVID-19 bwagaragaye mu Karere ka Rusizi.



Ni icyemezo Guverinoma y’u Rwanda yakomeje gusuzumana ubushishozi kuko imyiteguro yo gusubukura ingendo za moto yari yahujwe n’iyo gusubukura izihuza Umujyi wa Kigali n’izindi ntara, zari zimaze amezi asaga abiri zihagaritswe.

Inama y’Abaminisitiri yateranye ku wa Kabiri yafashe ingamba zitandukanye zigamije gukomeza kwirinda ikwirakwira ry’icyorezo cya Coronavirus, zirimo ko moto zitwara abagenzi zemerewe kongera gukora, umwihariko ushyirwa mu Turere twa Rusizi na Rubavu ndetse ko ingendo hagati y’intara zemewe ariko ko kujya no kuva mu Karere ka Rusizi na Rubavu byo bikibujijwe.

Ni inkuru nziza yakiriwe neza n’abamotari ndetse n’abagenzi kuko uyu munsi benshi bawufashe nk’ubukwe bwari butegerejwe igihe kirekire, bagashimangira ko amabwiriza nakurikizwa uko bikwiye ingendo zasubukuwe zitazaba icyuho cyo gukwirakwiza Coronavirus.

ku rundi ruhande ariko hari abamotari batangiye kugerwaho n’ingaruka zo kurenga ku mabwiriza yatanzwe mu rwego rwo gukomeza guhangana n’ikwirakwira rya COVID-19, bacibwa amande angana na 25 000 Frw ndetse moto zabo zirafatirwa, bakazazisubizwa bamaze kwishyura.

Ndikubwimana Mathieu yafashwe na Polisi azira kuba yari atwaye umugenzi utashyize agatambaro muri casque n’ubwo ibindi byose yari abyujuje, avuga ko iby’agatambaro k’umugenzi atari abizi. Ati:

Naraye kuri radio ntegereje icyo abayobozi bari butangaze ku cyemezo cyo gusubukura ingendo za moto ariko mu bintu twabwiwe ako gatambaro ntakari karimo.

Ni ikibazo ahuriyeho na Havugimana Aloys nawe wafashwe azira gutwara umugenzi utashyize agatambaro muri casque.

Yavuze ko imyumvire y’abantu ku ikoreshwa ry’udutambaro tw’abagenzi ikiri hasi ku buryo inzego zibishinzwe zikwiye kongera ubukangurambaga mu baturage.

Gukoresha imiti yica udukoko mbere na nyuma yo gutwara umugenzi kuri moto, kugenzura ko umugenzi ugiye kuri moto afite agambaro ko kwambara muri casque, kwishyura hifashishijwe ikoranabuhanga, guhana intera muri parikingi ni byo abatwara abagenzi kuri moto basabwa kubahiriza mu rwego rwo guhangana na COVID-19.

Ibi hari aho biri kubahirizwa uko bikwiye ariko hari n’ahakigaragara abishyurana mu ntoki, abamotari bavuga ko biterwa n’impamvu zitandukanye, zirimo kuba hari abatega moto bakifuza gukomeza kwiyumvikanira n’abamotari abandi ngo bakaba nta telefone baba bafite.

Umuvugizi wa Polisi y’u Rwanda, CP John Bosco Kabera, yasabye abatwara ibinyabiziga gukomeza kwitwararika kuko ubu gahunda yakomeje yitwa “Rwanya COVID-19, Gerayo amahoro.” Ati:

Nubwo turi kubahiriza aya mabwiriza yo kurwanya COVID-19 no kureba uburyo ashyirwa mu bikorwa, ubu gahunda noneho ni ‘Rwanya COVID-19, Gerayo amahoro’. Iyo wirinze uvuye mu rugo ukarinda utaha utayanduye uba ugezeyo amahoro; ariko noneho biba amahoro asesuye iyo ugeze aho hantu nta mpanuka ugize.

CP Kabera avuga ko kugira ngo abantu babe bazima bakwiye gukomeza kwirinda COVID-19 bari mu mihanda, bakirinda impanuka […] baba batwara moto cyangwa imodoka, abagenzi mu modoka ndetse n’abanyamaguru.

Inama y’Abaminisitiri yateranye ku wa 2 Kamena, yemeje kandi ko gahunda yo gupima abantu COVID-19 izakomeza mu gihugu hose, biyongera ku barenze ibihumbi 70 bamaze gupimwa kugeza ubu ndetse ko udupfukamunwa tuzakomeza kwambarwa igihe cyose umuntu agiye aho ahurira n’abandi.

Author : Martin Munezero

Munezero Martin ni Umwanditsi w’Ikinyamakuru Umuryango. Yatangiye gukorera iki kinyamakuru muri Nzeli 2014.

Imbuga nkoranyambaga ze:

Instagram:Martin Promoter
Facebook:Munezero Martin
Twitter :Martin Promoter

Ibitecyerezo

  • Who are you?
    Log in

    Amategeko n'amabwiriza birkurikizwa


Inzindi nkuru

Polisi y’u Rwanda yavuze ku murobyi w’Umurundi Ndagijimana Sylvestre...

Mu gitondo cy’uyu wa 5 Nyakanga 2020, Polisi y’u Rwanda yavuze ko umurobyi...
5 July 2020 Yasuwe: 4639 0

Kigali igiye gufata indi ntera mu guhindura isura[AMAFOTO]

Kimihurura ahazwi nka Minijust hagiye guhinduka burundu kuko inyubako zose...
29 June 2020 Yasuwe: 2114 0

Habonetse abarwayi 32 ba Coronavirus mu Rwanda hakira abandi...

Minisiteri y’Ubuzima mu Rwanda yatangaje ko kuri uyu wa Gatatu tariki ya 24...
24 June 2020 Yasuwe: 1636 0

Habonetse abarwayi 59 ba Coronavirus mu Rwanda,hakira 11

Uyu munsi tariki ya 22 Kamena 2020,ubaye uwa mbere ubonetseho abantu benshi...
22 June 2020 Yasuwe: 1768 0

Abasize ibikoresho byabo mu gishanga cya Gikondo bahawe iminsi 7 kuba...

Abahoze mu gace k’inganda ka Gikondo bategetswe gukuramo ibikoresho byabo...
19 June 2020 Yasuwe: 961 0

Abakoresha Mobile Money na Mobile Banking basabwe kwitwararika mu gukoresha...

Ikibazo cy’uburiganya bukorerwa abakoresha mobile money na mobile banking...
19 June 2020 Yasuwe: 1590 0